سوریا؛ داوا دەکرێت ناوچەی دژەفرین لە دژی تورکیا رابگەیەنرێت

- 12/6/2018 12:03:00 AM 8270 جار خوێندراوەتەوە

خەندان-ئاکام محەمەد

جیهان شێخ ئەحمەد، هاوسەرۆکی سەربازیی خۆسەریی سوریا لە باکور و رۆژهەڵاتی ئەو وڵاتە داوا لە ئەمەریکا دەکات" لە دژی فرۆکە جەنگییەکانی تورکیا، ناوچەی دژە فرین رابگەیەنێت".

ئەو وتانەی ئەو فەرماندە سەربازییە کوردەی سوریا دوای ئەوە هات ئەمرۆ حکومەتی ئەمەریکا نیازی خۆی پیشاندا لە هێشتنەوەی هێزە سەربازییەکانی لە باکوری رۆژهەڵاتی سوریا.

لە میانی کۆربەندێکدا کە رۆژی یەکشەممە، لە ژێر ناونیشانی" پاکتاویی نەژادیی و گۆڕانکاری دیمۆگرافی عەفرین" لە پارێزگای حەسەکە بەڕێوەچوو، تیایدا هاوشانی ساڵح موسلیم ٦٠ دیپلۆماتکار و راوێژکاری سەربازیی و سیاسی لە وڵاتانی ئەمەریکا، فەرەنسا، سویسرا، ئوسترالیا و ئەڵمانیا بەشداری پانێڵەکە بوون و سێ رۆژی خایاند، جیهان شێخ ئەحمەد وتی" تورکیا هیچ پاساوێکی یاسایی نیە بۆ هێرشکردنە سەر عەفرین".

نەسرین عەبدوڵا فەرماندەی یەکینەکانی پاراستنی ژنان، لە کۆربەندەکەدا ئامادەبوو، وتی" ئەگەر ناوچەی دژەفرینیش دروست نەکرێت، لەتواناماندا هەیە ٦٠ رۆژ بەرخۆدان بکەین".

ئەمرۆ کۆتایی بە پانێلە سێ رۆژەییەکەی حەسەکە هات، کە تیاییدا بۆ تاوتوێکردنی داهاتوی کوردەکانی رۆئاڤا و هەژمونی تورکیا لە سوریا بەڕێوەچو.

بێرنارد کوچنەر، وەزیری پێشوتری دەرەوەی فەرەنسا و بەرگریکارێکی چالاکی ریفراندۆمی سەربەخۆیی کوردستان، کە یەکێک بوو لە بەشداربوانی کۆڕبەندەکە داوای لە وڵاتانی جیهان بە گشتی و ئەوروپا بەتایبەت کرد دژی داگیرکاری تورکیا بوەستنەوە.

کوچنەر لە وتەکانیدا جەختی لەوەکردەوە چالاکی و هەژمونی تورکیا لە ناو خاکی سوریا و لە خاڵە سنورییەکاندا " نایاساییە".


Copyright © 2016 Xendan.org all rights reserved

designed and developed by AVESTA GROUP