عادل عەبدولمەهدى پەرلەمانى جێهێشت
دەنگدان بە کاندیدانى وەزارەتە بەتاڵەکانى عێراق دواخرا

- 12/4/2018 5:54:00 PM 3871 جار خوێندراوەتەوە

خەندان-بڕیار جلال

هەر ئێستا عادل عەبدولمەهدى و کاندیدانى هەشت پۆستە وزارییەکەى پەرلەمانى عێراقیان جێهێشت.

سەرچاوەیەک لەناو هۆڵى پەرلەمانى عێراق زانیارییەکانى بۆ خەندان پشتڕاستکردەوەو ڕایگەیاند: بڕیاربوو لە کۆبوونەوەى ئەمڕۆدا جگە لە دەنگدان بە کاندیدانى پۆستە بەتاڵەکانى کابینەکەى عادل عەبدولمەهدى، گفتوگۆ لەسەر بابەتى بەرهەمهێنانى وزە بکرێت".

ئەو سەرچاوەیە ڕاشیگەیاند: " لە ئێستادا عادل عەبدولمەهدى و کاندیدەکان پەرلەمانى عێراقیان جێهێشتووە، بەڵام کۆبوونەوەکە دوانەخراوەو بڕیارە کاتژمێر ٦ ى ئێوارە دەستپێبکاتەوەو گفتوگۆ دەکرێت لەسەر بەرهەمهێنانى وزە و بۆ ئەوەى بدرێتە کەرتى تایبەت لە عێراق".

 
بەهۆى دروستبوونى گرژى و ئاڵۆزى، پەرلەمانى عێراق  کۆبوونەوەکەى بۆ دەنگدان بە کاندیدانى پۆستە وەزارییەکانى ترى حکومەتەکەى عادل عەبدولمەهدى بۆ ماوەى یەک کاتژمێر دواخست.

دوێنێ عادل عەبدولمەهدى ناوى کاندیدانى هەر هەشت وەزارەتەکەى بۆ ئەنجوومەنى نوێنەرانى عێراق نارد، تا لە کۆبوونەوەى ئەمڕۆدا بڕیارى لەسەر بدەن، ئەمەى خوارەوە ناوى کاندیدەکانە:

حاکم دارا نورەدین: کاندیدی وەزارەتی داد
فالح فەیاز: کاندیدی وەزارەتی ناوخۆ
فيصل الجربا : کاندیدى وەزارەتی بەرگری 
عەبدولئەمیر حەمدانی: کاندیدى وەزارەتی ڕۆشنبیری
نوری دلێمی: کاندیدى وەزارەتی پلاندانان
د. صبا تائی: کاندیدى وەزارەتى  پەروەردە
قوسەی عەبدولوەهاب : کاندیدى وەزارەتى خوێندنی باڵا
هناء عمانوئيل: وەزارەتى کۆچ و کۆچبەران

سێشەممەى هەفتەى ڕابردوو بەهۆى ناکۆکى نێوان لایەنە سیاسییەکانى عێراق و نەگەشتنە ڕێککەوتنیان لەسەر یەکلاکردنەوەى پۆستە بەتاڵەکانى حکومەتەکەى عادل عەبدولمەهدى، سەرۆکایەتى ئەنجوومەنى نوێنەران بڕیاریدا بە دواخستنى دانیشتنى پەرلەمان بۆ سبەى سێشەممە.


Copyright © 2016 Xendan.org all rights reserved

designed and developed by AVESTA GROUP