به‌هۆى گرژى و ئاڵۆزییه‌كانه‌وه‌ كۆبونه‌وه‌ى په‌رله‌مان بۆ یه‌ك كاتژمێرى دیكه‌ دواخرا

- 12/4/2018 5:19:00 PM 4403 جار خوێندراوەتەوە

خەندان-بڕیار جەلال

بەهۆى دروستبوونى گرژى و ئاڵۆزى، پەرلەمانى عێراق  کۆبوونەوەکەى بۆ دەنگدان بە کاندیدانى پۆستە وەزارییەکانى ترى حکومەتەکەى عادل عەبدولمەهدى بۆ ماوەى یەک کاتژمێر دواخست.

د. ڕێبوار کەریم ئەندامى پەرلەمانى عێراق بە خەندان-ى ڕاگەیاند: "کەمێک پێش ئێستا بڕیاربوو کۆبوونەوەى پەرلەمان ئەنجام بدرێت و ١٦٧ ئەندام ئامادەى دانیشتنەکە بوون، بەڵام لیستى سائیرون نارەزاییان نیشانداو بەو هۆیەوە گرژى و ئاڵۆزى دروستبوو، بۆیە سەرۆکایەتى پەرلەمان بڕیارییدا بە دواخستنى کۆبوونەوەکە بۆ ماوەى یەک کاتژمێر".

بەبڕواى ئەو ئەندامەى پەرلەمانى عێراق، بەهۆى تێبینى بەشێکى زۆر لە لایەنە سیاسییەکان لەسەر کاندیدەکان، پێناچێت ئەمڕۆ بتوانرێت ئەو هەشت پۆستە وەزارییە یەکلابکرێتەوە کە بەبەتاڵى لەناو حکومەتەکەى عادل عەبدولمەهدى ماونەتەوە.

لەلایەکى ترەوە سەرچاوەیەکى ئاگادار لەکۆبوونەوەکان بە خەندان-ى ڕاگەیاند: بەهۆى ئەوەى هەریەک لە یەکێتى و یەکگرتوو گۆڕان و هاوپەیمانى تێبینیان لەسەر کاندیدە کوردەکە هەیە بۆ وەزارەتى داد، بەشدارى کۆبوونەوەکە ناکەن، بەڵام هەریەک لە پارتى و نەوەى نوێ و کۆمەڵ بەشدارى کۆبوونەوەکەیان کردووە.

 

هەر بەپێى ئەو سەرچاوەیە، دواى دروستبوونى گرژییەکان، عادل عەبدولمەهدى سەرۆک وەزیرانى عێراق و ئەو کاندیدانەى بڕیاربوو دەنگیان پێبدرێت بۆ پڕکردنەوەى هەشت وەزارەتەکە، هۆڵى کۆبوونەوەى پەرلەمانیان جێهێشت.

دوێنێ عادل عەبدولمەهدى ناوى کاندیدانى هەر هەشت وەزارەتەکەى بۆ ئەنجوومەنى نوێنەرانى عێراق نارد، تا لە کۆبوونەوەى ئەمڕۆدا بڕیارى لەسەر بدەن، ئەمەى خوارەوە ناوى کاندیدەکانە:

حاکم دارا نورەدین: کاندیدی وەزارەتی داد
فالح فەیاز: کاندیدی وەزارەتی ناوخۆ
فيصل الجربا : کاندیدى وەزارەتی بەرگری 
عەبدولئەمیر حەمدانی: کاندیدى وەزارەتی ڕۆشنبیری
نوری دلێمی: کاندیدى وەزارەتی پلاندانان
د. صبا تائی: کاندیدى وەزارەتى  پەروەردە
قوسەی عەبدولوەهاب : کاندیدى وەزارەتى خوێندنی باڵا
هناء عمانوئيل: وەزارەتى کۆچ و کۆچبەران

سێشەممەى هەفتەى ڕابردوو بەهۆى ناکۆکى نێوان لایەنە سیاسییەکانى عێراق و نەگەشتنە ڕێککەوتنیان لەسەر یەکلاکردنەوەى پۆستە بەتاڵەکانى حکومەتەکەى عادل عەبدولمەهدى، سەرۆکایەتى ئەنجوومەنى نوێنەران بڕیاریدا بە دواخستنى دانیشتنى پەرلەمان بۆ سبەى سێشەممە.

 



Copyright © 2016 Xendan.org all rights reserved

designed and developed by AVESTA GROUP