ریزبەندی باشترین پاسپۆرتی وڵاتان بڵاوکرایەوە
پاسپۆرتی ئیمارات بووە بەهێزترین پاسپۆرت لە ئاستی جیهاندا

- 12/2/2018 10:27:00 AM 39820 جار خوێندراوەتەوە

خەندان-

ماڵپەڕی پاسپۆرت ئیندێکس دوایین ریزبەندی پاسپۆرتەکانی جیهانی بڵاوکردەوە و پاسپۆرتی ئیمارات بووە بەهێزترین پاسپۆرت لە ئاستی جیهاندا، پاسپۆرتی عێراقیش لە خراپترین پاسپۆرتەکانی جیهانە.

بەپێی ریزبەندییەکەی ماڵپەڕی پاسپۆرت ئیندێکس کە سەر بە کۆمپانیای ئەرتون کاپیتاڵ بۆ راوێژکاریی دارایی جیهانییە، هەڵگرانی پاسپۆرتی ئیماراتی دەتوانن بچنە 167 وڵاتی جیهان.

ئاماژە بەوەشکراوە، هەڵگرانی پاسپۆرتی ئیماراتی دەتوانن سەردانی 113 وڵات بکەن بە بێ ڤیزای پێشوەخت، هەروەها 54 وڵاتیش دوای ئەوەی دەچنە وڵاتەکەوە لە فڕۆکەخانە ڤیزایان پێدەدرێت. 

بەپێی ریزبەندییەکەی ماڵپەڕی پاسپۆرت ئیندێکس پاسپۆرتی سەنگاپوورە لە پلەی دووەم و پاسپۆرتی ئەڵمانیش لە ریزبەندی سێیەم و پاسپۆرتی  دانیمارک لە ریزبەندی چوارەم و پاسپۆرتی سوید لە ریزبەندی پێنجەمدایە.

هەروەها هەریەکە لە پاسپۆرتەکانی وڵاتانی فینلەندا و لۆکسەمبۆرگ و فەڕەنسا و ئیتاڵیا و هۆڵەندا لە شەشەم تاوەکو دەیەمی ریزبەندییەکەدان.

هاوکات پاسپۆرتی عێراق و ئەفغانستان لە خراپترین پاسپۆرتەکانی جیهانن لە ریزبەندی کۆتاییدان.



Copyright © 2016 Xendan.org all rights reserved

designed and developed by AVESTA GROUP