تورکیا بڕیاری کۆتایی لەسەر داواکاریەکەی یەکێتی ئەوروپا بۆ ئازادکردنی دەمیرتاش راگەیاند

- 11/30/2018 5:16:00 PM 28581 جار خوێندراوەتەوە

خەندان-

دادگای باڵای تورکیا داواکارییەکەی یەکێتی ئەوروپای رەتکردەوە سەبارەت بە ئازادکردنی سەڵاحەدین دەمیرتاش و بڕیاریدا بە  مانەوەی دەمیرتاش لە زیندان.

رۆژی سێشەممە، رێکەوتی ٢٠/١١/٢٠١٨ دادگای مافەکانی مرۆڤی ئەوروپا داوای ئازادکردنی سەڵاحەدین دەمیرتاش، هاوسەرۆکی پێشوی هەدەپەی کرد.

لە داواکارییەکەی دادگای مافەکانی مرۆڤی یەکێتی ئەوروپادا هاتبوو، مافی دەمیرتاش بۆ دادگاییکردنێکی خێرا و مافی بەشداریکردنی لە دەنگداندا پێشێلکراوە و " دەبێت بەزوترین کات سەڵاحەدین دەمیرتاش ئازاد بکرێت".

بەگوێرەی ئاژانسی ئەنادۆڵ، زمانحاڵی حکومەتی تورکیا ئەمرۆ دادگای باڵای تورکیا بە فەرمی ئەو داوایەی دادگاکەی یەکێتی ئەوروپای رەتکردووەتەوە و بریاریداوە بە هێشتنەوەی لەزینداندا.
 
هەفتەی رابردوو، عەبدولحەمید گیول وەزیری دادی تورکیا لە لێدوانێکدا ڕایگەیاند، "چاوەڕێین بڕیارەکەی دادگای مافی مرۆڤی ئەوروپا بگاتە دەستمان، ئەو کات دادگای تورکیا بڕیاری پێویست لەبارەی دۆسیەکەوە دەدات".

لەلایەکی دیکەوە مەحسونی کاهرەمان، پارێزەری دەمیرتاش ئاشکرایکرد، "دوای بڕیارەکەی دادگای مافی مرۆڤی ئەوروپا، مانەوەی دەمیرتاش لە زیندان بۆ هەر کاتژمێرێک پێشێلکردنی مافی ئازادی ئەوە، ئەمڕۆ دەستبەجێ داوای ئازادکردنی دەمیرتاش پێشکەشی دادگا دەکەین".


Copyright © 2016 Xendan.org all rights reserved

designed and developed by AVESTA GROUP