هەرئێستا

لەکۆبوونەوەی ئەمڕۆی پەرلەمانی عێراقدا لیژنە هەمیشەییەکان هەڵدەبژێردرێن

- 11/8/2018 12:56:00 PM 1925 جار خوێندراوەتەوە

خەندان- خۆزگە عەزیز

ئەندامێکی پەرلەمانی عێراق رایگەیاند، لە کۆبوونەوەی ئەمڕۆی پەرلەمانی عێراقدا لیژنە هەمیشەییەکان هەڵبژێردرێن، وەزیری دادیش بۆ یەکیتی یەکلایی بووەتەوە.

میران محەمەد، ئەندامی پەرلەمانی عێراق لە فراکسیۆنی یەکێتی بە خەندان-ی راگەیاند، ئەمڕۆ لیژنە هەمیشەییەكانی ئەنجومەنی نوێنەران پێكدەهێندرێن، هەروەها بەئامادەبونی وەزیرانی كشتوكاڵ و تەندروستی لەبارەی دیاردەی مرداربوونەوەی ماسییەکانی پارێزگای بابل گفتوگۆ دەكرێت.

بەشێكی دیكەی دانیشتنەكەی ئەمڕۆی ئەنجومەنی نوێنەران تایبەتە بەپێكهێنانی لیژنەی لێكۆڵینەوە لەبارەی چۆنیەتی هەڵبژاردنی پارێزگاری بابل، هەروەها لەسەر دەستکاریکردنی بوودجەش گفتوگۆدەکرێت، کە لیژنەیەکی لە نێوان حکومەت و پەرلەمانتاراندا بۆ پێکهێنراوە.

25ی مانگی ئۆكتۆبەر، پەرلەمانی عێراق دەنگیدا لەسەر عادل عەبدولمەهدی، سەرۆك وەزیرانی نوێی عێراق و 14وەزیری كابینەكەی، كە لە ناویاندا دوو وەزارەت دران بە كورد، بەڵام تا ئێستا وەزیرانی هەشت وەزارەت یەكلایی نەبوونەتەوە.



Copyright © 2016 Xendan.org all rights reserved

designed and developed by AVESTA GROUP