سەرۆكایەتی شارەوانی چەمچەماڵ هۆشداری دەداتە هاوڵاتیان

- 10/18/2018 11:13:00 AM 8537 جار خوێندراوەتەوە

خەندان-

سەرۆكایەتی شارەوانی چەمچەماڵ رایگەیاند، ژمارەیەك هاوڵاتی بەناوی شارەوانی و دەزگای شەهیدانەوە پەیوەندی بە هاوڵاتیانەوە دەكەن، كە گوایە زەویان بەسەردا دابەشدەكەن و لە بەرامبەردا داوای پارە یان كارتی مۆبایلیان لێدەكەن.

سەرۆكایەتی شارەوانی چەمچەماڵ لە راگەیەندراوێكدا رایگەیاند، "چەند رۆژێكە چەند كەسێكی بە سیمكارتی نەناسراو تەلەفۆن بۆ هاوڵاتیان دەكەن بەناوی شارەوانی و دەزگای شەهیدانەوە مژدەی پێدانی دابەشكردنی زەوی بەو ھاوڵاتیانە دەدەن كە فەرمانی زەویان ھەیەو داوای كارتی مۆبایل یان پارەیان لێدەكەن".

لە راگەیەندراوەكەدا هاتووە، ئەوان وەك شارەوانی چەمچەماڵ داوا دەكەن ھەر كەس لە رێگەی تەلەفۆن یان ھەر رێگایەكی دیكەوە داوای كارتی مۆبایل یان پارەی كرد باوەڕی پێمەكەن و ئەو كەسانە ھیچ پەیوەندییەكیان بەشارەوانییەوە نییە.

هەروەها دەڵێت، پێشتریش بەناوی دابەشكردنی زەوی بە كەمئەندامان چەند جارێك كەسانی لەو جۆرە پەیوەندیان دەكرد و داوای پارەیان دەكرد.


Copyright © 2016 Xendan.org all rights reserved

designed and developed by AVESTA GROUP