سوریا له‌ لێوارى شه‌ڕێكى جیهانى گه‌وره‌دایه‌
موشه‌كه‌ باڵداره‌كانى وڵاتان جوڵه‌یان پێكراوه‌و ناتۆ دوو رۆژى پێویسته‌

- 9/13/2018 9:56:00 PM 99982 جار خوێندراوەتەوە


خەندان- خۆشناو حسێن

دۆخى سوریا له‌ لێوارى ده‌ستپێكى قۆناغێكى دیكه‌ى خوێناویدایه‌ و گه‌وره‌كانى جیهان له‌ ئیلب-ى ئه‌و وڵاته‌، هه‌ره‌شه‌ى نمایشى هێزى خۆیان ده‌كه‌ن و به‌ره‌ى روسیا ده‌ستى به‌ ئاگر بارانى شاره‌كه‌ كردووه‌ و ئه‌مه‌ریكا و ئه‌وروپاش هه‌ره‌شه‌ ده‌كه‌ن. 

بە پێی ئاژانسی سپۆتنیکی روسی، دۆخی سوریا لە یەکلایبوونه‌وه‌ نزیکه‌، دوو بژارده‌ هه‌یه‌، یاخود یەکێک لەم دوو لایەنه‌(ناتۆ–روسیا) سوریا بەجێدەهێڵن یانیش رووبەڕووبونەوەیەکی کراوە لە نێوان روسیا و ئێران لە دژی ویلایەتە یەکگرتووەکانی ئەمەریکا و بەریتانیا و فەرەنسا دەستپێدەکات.

بەپێى ئاژانسەکە ناتۆ له‌ ئێستادا پێویستی بە دوو رۆژی دیکە هەیە بۆ تەواوکردنی گروپی لێدانی سوریا، به‌ كۆتا گه‌یشتنى ئاماده‌كارییه‌كانى.

مووشەکی تۆماهۆک

ژێردەریایی ئەتۆمی بەریتانی"HMS Talent"رۆژی 8ى ئەم مانگە گەیشتە دەریای سپی و هەڵگری 10مووشەکی باڵداری( تۆماهۆکە) توانای پێکانی ئامانجەکانی هه‌یه‌ لە دووری هه‌زار و 600 کیلۆمەتره‌وه‌. 

بەپێی ماڵپەری"كاتیوشا ئۆرغ"ی روسی مەودای نێوان ژێردەریایی بەریتانی و کەنارەکانی سوریا دەگاتە سَى هه‌زار و 360 کیلۆمەتر، واتە پێویستی بە نزیکبوونەوەی دوو هەزار کیلۆمەتر هەیە، بۆ پێکانی ئامانجەکانی لە سوریا و ئەمەش پێویستی بە 40 کاتژمێر هەیە تا بگاتە شوێنی پێویست.

لە ئێستادا سێ ژێردەریایی ئەتۆمی، لەگەڵ سێ کەشتی جەنگی ئەمەریکی، لە دەریای سپی جێگربوونەتەوە و ئەو گروپە هەڵگری 148مووشەکی تۆماهۆکن.

ئەمەریکا لێدانی هێزە نه‌یاره‌كانى بە دوور نازانێ

رۆژنامەی"ووڵ ستریت جۆرنال" لە زاری بەرپرسانی ئەمەریکییه‌وه‌ بڵاویكرده‌وه‌، کە دۆناڵد ترەمپ، سەرۆکی ئەمەریکا تاوتوێی لێدانی هێزەکانی روسیا دەکات لە سوریا ئەگەر هێرش لە دژی هێزەکانی حکومەتی سوریا ئەنجام بدرێت.

دۆخی رۆژهەڵاتی ناوەڕاست سەرەتای شەڕی جیهانییە؟

وڵامدانەوەی روسیا لە بەرامبەر هەر هێرشێکی ئەمەریکا بۆسەر سوریا ده‌بێتە هۆی هەڵگیرسانی شەڕی جیهانی، ئەمە لەكاتێکدایە روسیا مانۆڕی گەورەى لە دەریای ناوەڕاست ئەنجامداوە و گەورەترین هێزی خۆی بڵاوه‌ پێکردووە لەو ناوچەیە کە هێزەکانی چین و مەنگۆلیاش بەشدارن لە مانۆڕی (رۆژهەڵات – ٢٠١٨).

به‌پێى راپۆرتى شیكارى ووڵ ستریت جۆرنال، تەنها یەک شت ئۆمێد به‌خشه‌ بۆ روونه‌دانى شه‌ڕ، ئەویش ئەوەیە کە واشنتن دەست بەو شەڕە نەکات.


Copyright © 2016 Xendan.org all rights reserved

designed and developed by AVESTA GROUP