17 ساڵ بەسەر هێرشەكەدا‌ تێدەپەڕێت
جۆرج بوش چۆن هەواڵی هێرشەكانی 11ی‌ سێپتەمبەری پێگەیشت؟

- 9/11/2018 1:30:00 PM 86508 جار خوێندراوەتەوە

خەندان- خۆشناو حسێن

ویلایەتە یەكگرتووەكانی ئەمەریكا ئەمڕۆ سێشەممە ساڵیادی هێرشەكەی 11ی سێپتەمبەری 2001 دەكاتەوە، كە بووەهۆی كوژرانی نزیكەی سێ هەزار هاوڵاتی ئەو وڵاتەو برینداربوونی هەزاران هاوڵاتی دیكەش.

11ی سێپتەمبەری ساڵی 2001 گروپێكی 19ی كەسی سەر بە رێكخراوی ئەلقاعیدە فڕۆكەیەكی لە رێگەی سێ فڕۆكەوە هێرشیان كردە سەر ناوەندی بازرگانی جیهانی لە نیویۆرك و باڵاخانەی پێنتاگۆن لە واشنتۆن و كێڵگەی پەنسیلڤانیا.

ئەو كەسانەی هێرشەكانی 11ی سێپتەمبەریان ئەنجامدا دابەشبوون بەسەر چوار گروپدا، هەریەكێك لەو گروپانە كەسێكی تێدابووە، كە لە پەیمانگای فڕینی ئاسمانی ئەمەریكادا خوێندوویەتی.

میدیاكانی ئەمەریكا گرتەیەكی ڤیدیۆییان بڵاوكردەوە، لەو ساتەوەختەدا تۆماركراوە كە جۆرج بوش، سەرۆكی ئەوكاتەی ویلایەتە یەكگرتووەكانی ئەمەریكا هەواڵی هێرشەكەی پێدەگات.

لە كاتی هێرشی یەكەم بۆ سەر بورجی باكوور لە نیویۆرك، جۆرج بوش لە قوتابخانەیەكی منداڵان بووە لە ناوچەی ساراسوتا لە ویلایەتی فلۆریدا.

 لە گرتە ڤیدیۆكەدا دەردەكەوێت ئەو ساتەی "ئەندرۆ كارد" گەورە راوێژكاری كۆشكی سپی بە گوێی بوشدا دەچرپێنێت و لە هێرشەكە ئاگاداری دەكاتەوە.

جۆرج بوش لە كاتی بیستنی هەواڵی هێرشەكە بە خێرایی مشتومڕەكانی لەگەڵ خوێنكارەكان كۆتایی پێدەهێنێت، و دەچێتە یەكێك لە ژوورە چۆڵەكانی قوتابخانەكە بۆ زانینی وردەكاری رووداوەكە.

جۆرج بوش كۆبوونەوەیەكی بچوك لەگەڵ یاریدەدەرەكانی ئەنجامدەدات، و چەند پەیوەندییەكی تەلەفۆنی لەبارەی هێرشە یەك لە دوای یەكەكانەوە ئەنجامدەدات.

هێرشەكانی 11ی سێپتەمبەری 2001 بووە هۆی كوژرانی دوو هەزار و 973 كەس، و هەزاران كەسی دیكەش برینداربوون، دواتریش رێكخراوی ئەلقاعیدە بە سەرۆكایەتی ئوسامە بنلادن بەرپرسیارێتی لە هێرشەكە راگەیاند، ئەوەش وایكرد واشنتۆن گۆڕانكاری لە سیاسەتی دەرەوەی ئەمەریكادا بكات و هێرشبكاتە سەر ئەفغانستان بۆ لەناوبردنی ئەلقاعیدە و دواتریش عێراق.

هەروەها دوای نزیكەی دەیەیەك هێزەكانی ویلایەتە یەكگرتووەكانی ئەمەریكا بە سەرۆكایەتی باراك ئۆباما، سەرۆكی پێشووی ئەو وڵاتە ئوسامە بن لادن-یان لە ئۆپەراسیۆنێكی سەربازی تایبەتدا كوشت.


نیشانەکردن :

#ئه‌مه‌ریكا

Copyright © 2016 Xendan.org all rights reserved

designed and developed by AVESTA GROUP