ئەردۆغان داوا لە خەڵکی وڵاتەکەی دەکات دژی "هێرشە ئابورییەکان" یەکبگرن

- 8/25/2018 5:32:00 PM 7235 جار خوێندراوەتەوە

خەندان-

رەجەب تەیب ئەردۆغان، سەرۆکۆماری تورکیا داوا لە خەڵکی وڵاتەکەی دەکات دژی ئەو هێرشانە یەکبگرن  کە" سەربەخۆیی ئابوریی و سیاسیی تورکیای تیادا بە ئامانجگیراوە".

سەبارەت بەو قەیرانەی کە ماوەی زیاتر لە مانگێکە رووبەڕووی دراوی تورکی بووەتەوە، ئەردۆغان ئاماژەی بەوەدا پێداگریی و پابەندیی خەڵکی وڵاتەکەی لە بڕیارەکانی سەرکردایەتی تورکیا سەرکەوتنیان لە شەری دژی ئابوری تورکیا مسۆگەرتر دەکات.

لە سەرەتای ئەمساڵەوە تا ئێستا لیرەی تورکی سەدا ٤٠ بەهاکەی لەدەستداوە، بەهۆی سیاسەت و رێکارەکانی سەرکردایەتی تورکیا سەبارەت بە دراو و رێژەی سودی بانقەکان و سزا سەپێنراوەکانی  واشنتن بۆ سەر ئابوری ئەنقەرە.

ئەردۆغان لە ماوەی رابردوشدا چەندین جار داوای لە خەڵکی وڵاتەکەی کرد، یەکبگرن لە دژی ئەو قەیرانە ئابورییەی بەسەریاندا سەپێنراوە و لە وتەکانی ماوەی رابردووشیدا  جەختی لەوەکردووەتەوە کە، "هێرشەکانی ئەمەریکا بۆ سەر ئابوری تورکیا هیچ جیاوازییەکی نییە لەگەڵ هێرش بۆ سەر ئاڵای تورکیا و بانگی مزگەوتەکان".


Copyright © 2016 Xendan.org all rights reserved

designed and developed by AVESTA GROUP