لەماوەی كەمتر لەمانگێك مامۆستایان دوو مووچە وەردەگرن
وەزیری دارایی: دوو رۆژی داهاتوو لیستی دووەمی مووچە بڵاودەكەینەوە

- 7/16/2018 11:55:00 AM 137322 جار خوێندراوەتەوە

خەندان- سالار محه‌مه‌د

شاندێكی یەكێتی مامۆستایانی كوردستان و وەزیری دارایی حكومەتی هەرێمی كوردستان  لەبارەی چەند پرسێكی مامۆستایان كۆبوونەوەو ئەندامێكی سكرتارییەتی مامۆستایانیش رایدەگەیەنێت، وەزیری دارایی وتوویەتی، "دوو رۆژی داهاتوو لیستی دووەمی مووچە بڵاودەكەینەوە".

ئەحمەد كەركوكی، ئەندامی سكرتاریەتی یەكێتی مامۆستایانی كوردستان بەخەندان-ی راگەیاند، ئەمڕۆ دووشەممە شاندێكی باڵای یەكێتی مامۆستایانی كوردستان تایبەت بەمووچەی مامۆستایان و ئەو مامۆستایانەی كە تائێستا نەكراون بەفەرمانبەری هەمیشەیی كۆبوونەتەوە.

ئەحمەد كەركوكی وتیشی، "وەزیری دارایی رایگەیاندووە لە دوو رۆژی داهاتوو لیستێكی دیكەی مووچەی ئەو وەزارەتانە رادەگەیەنن كە مووچەی مانگی چواریان پێنەدراوە، وەزارەتی پەروەردەش یەكێك دەبێت لەو وەزارەتانە، بۆمانگی داهاتووش وەزارەتی پەروەردە دووەم وەزارەت دەبێت مووچەیان پێدەدرێت".
 
بەپێی ئەو لێدوانەی ئەندامەكەی سكرتاریەتی یەكێتی مامۆستایانی كوردستان بێت ئەوا مامۆستایان لەماوەی كەمتر لە مانگێكدا دوو مووچەیان پێدەدرێت.

ئەحمەد كەركوكی ئەوەشی خستەڕوو، هەروەها لەوكۆبوونەوەیەدا باس لەو مامۆستایانەش كرا كە ماوەی یاسای گرێبەسەتەكانیان تەوابوەو تائێستا نەكراون بە فەرمانبەری هەمیشەی وەزیری دارایی وتی بەهۆی نەبوونی بوودجەوە نەتوانراوە ئەو مامۆستایانە بكرێن بەفە رمانبەری  هەمیشەی".


Copyright © 2016 Xendan.org all rights reserved

designed and developed by AVESTA GROUP