بۆردومان و تەقەی سوپای تورکیا زیانی گیانی لێکەوتەوە

- 7/15/2018 10:10:00 PM 5344 جار خوێندراوەتەوە


خەندان-وڵات برادۆستی 

لە ئاکامی بەردەوامی بۆردومانەکانی سوپای تورکیا لە سنوری برادۆست منداڵێکی تەمەن پێنج ساڵان گیانی لەدەستدا و بەڕێوەبەری تەندروستی ناوچەی نزارییەی ئەو سنورەش رایگەیاند، منداڵەکە لە ترسی بۆردومانەکان گیانی لەدەستداوە. 

کاروان حەمید، بەڕێوەبەری بنکەی تەندروستی گوندی نزارییە بە خەندان-ی راگەیاند، کاتژمێر هەشت-ی ئەم ئێوارەیە منداڵێکی پێنج ساڵان بە ناوی محەمەد مەعروف گەیەنراوەتە بنکە تەندروستیەکەی نزارییە و دوای پشکنین دەرکەوتووە ئەم منداڵە گەشکەی هەبووە و بە کاریگەری تۆپبارانەکان و "لەترسا" گیانی لەدەستداوە. 

هاوکات ئیحسان چەلەبی، بەڕێوەبەری ناحیەی سیدەکان بە خەندان-ی راگەیاند، لە کاتژمێر ٦:٠٠ ی ئەم ئێوارەیەوە هەتا کاتژمێر ٧:١٥ بۆردومان و تەقەی سوپای تورکیا لە ناوچەکە بەردەوام بووە و پەکەکەش لە سێ قۆڵەوە لە چیادێل لەگەڵ سوپای تورکیا رووبەڕووبووەتەوە.  

مەسیح حەمەد، هاوڵاتیەکی دانیشتوی گوندی نزارییە بۆ خەندان وتی، ئەو منداڵەی گیانی لەدەستداوە لە ناحیەی رزگاری پارێزگای هەولێرەوە بە مەبەستی سەردان رووی لە ناوچەکە کردووە.


Copyright © 2016 Xendan.org all rights reserved

designed and developed by AVESTA GROUP