ئەو كەسەی مریشكە مردارەوەبووەكانی خستە ئاوی زەڵمەوە دەستگیركرا

- 7/4/2018 8:59:00 AM 136581 جار خوێندراوەتەوە

خەندان-

پارێزگاری هەڵەبجە رایگەیاند، لە پاش پێكهێنانی لیژنەیەكی تایبەتمەند توانراوە ئەو كەسە دەستگیربكرێت كە مریشكە مردارەوەبووەكانی خستووەتە ئاوی زەڵمەوە.

شەوی 1ی ئەم مانگە، بەهۆی مردارەوەبوونی مریشكەكانی خاوەنی یەكێك لە كیڵگەكانی پەلەوەر نزیكەی 1000 مریشكی مردارەوەبوو لەناوفەردەدا دەخاتە ئاوی زەڵم، كەدەكەوێتە نێوان سەیدصادق و ناحیەكانی سیروان و خورماڵ.

لە راگەیەندراوێكدا عەلی عوسمان، پارێزگاری هەڵەبجەدا ئاماژەی بەوەكردووە، توانراوە ئەو كەسە دەستگیربكرێت كە مریشكە مردارەوەبووەكانی خستووەتە ئاوی زەڵمەوە و دوای دەستگیركردنی ڕەوانەی دادگا كراوە،

عەلی عوسمان ئاماژەی بەوەشكردووە، كۆمەڵێك سزا بەسەر ئەو خاوەن كێڵگەیەدا سەپێندراوە كە خاوەنی مریشكەكان بووە.

راشیگەیاندووە، "تیمەكانی تایبەت بە پاككردنەوەی ژینگە و هەڵگرتنی خۆڵ و خاشاك ئاوەكەیان لەوه‌ پاككردەوە دڵنیایی پاكی ژینگە و ئاوی زەڵمیان بەهاوڵاتیان داوە".

سزاكانی پارێزگاری هەڵەبجە بۆ سەر تۆمەتبار بریتیبون لە وەرگرتنەوەی مۆڵەتی كێڵگە پەلەوەرییەكە و پاككردنەوەی ڕێڕەوی ئاوی زەڵم، ئەوە جگە لەو سزایەی دوای دادگاییكردن لەلایەن دادگاوە كە بەسەریدا دەسەپێنرێت.


Copyright © 2016 Xendan.org all rights reserved

designed and developed by AVESTA GROUP