رۆحانی داوا لە ماكرۆن دەكات بجوڵێت بۆ رزگاركردنی رێككەوتنە ئەتۆمییەكە

- 6/13/2018 8:56:00 AM 6569 جار خوێندراوەتەوە

خەندان-

حەسەن ڕۆحانی، سەرۆك كۆماری رایگەیاند، مانەوەی ئێران لە رێككەوتنە ئەتۆمییەكە لەگەڵ هێزەكانی جیهاندا "شتێكی مەحاڵە" ئەگەر سوودی لێنەبینێت، ئەوەش دوای كشانەوەی ئەمەریكا هات لە رێككەوتنەكە.

ڕۆحانی لە پەیوەندییەكی تەلەفۆنیدا لەگەڵ ئیمانوێل ماكرۆن، سەرۆكی فەڕەنسا وتی، ڕازییە بە هەڵوێستی وڵاتانی ئەوروپا و بە تایبەتی هەوڵەكانی فەڕەنسا بۆ ڕزگاركردنی رێككەوتنە ئەتۆمییەكە بەڵام وتیشی، "ئەم جۆرە لێدوانانە پێویستە كردار و ڕێوشوێنی بەرجەستەی لەگەڵدا بێت."

دەزگای هەواڵی كۆماری ئیسلامی ئێران لە زاری ڕۆحانیەوە بۆ ماكرۆن بڵاویكردەوە، "ئەگەر ئێران نەتوانێت سوود لە رێككەوتنە ئەتۆمییەكە ببینێت ئەوا مەحاڵ دەبێت ئێران لە ڕووی كردارییەوە لە ڕێكەوتنەكەدا بمێنێتەوە".

هاوكات نوسینگەی ئیمانوێل ماكرۆن بڵاویكردەوە، لە پەیوەندییە تەلەفۆنیەكەدا بە ڕۆحانی راگەیاندووە هێشتا وڵاتەكەی پابەندە بە رێككەوتنە ئەتۆمییەكە و پێویستە لەسەر تاران بەتەواوەتی پابەندی بەڵێنەكانی بێت.

ئاماژەی بەوەشكرد، "سەرۆك كۆمار ئاماژەی بە سووربوونی فەڕەنسا و بەڕیتانیا و ئەڵمانیا و ڕوسیا و چین داوە لە بەردەوامبوون و جێبەجێكردنی رێككەوتنەكەی ڤییەنا."

نوسینگەی ماكرۆن ئەوەشی خستەڕوو، "سەرۆك بە سەرۆكی ئێرانی ڕاگەیاندووە كە پێشڕەوی هەیە لەو كارانەی كە دەیكەین لەلای خۆمانەوە، هەروەها هیوای خۆشی دەربڕی بەوەی ئێران پابەند دەبێت بە بەرپرسیارێتییەكانیەوە بەبێ هیچ كەم و كورتییەك".

نیشانەکردن :

#ئێران #فه‌ڕه‌نسا

Copyright © 2016 Xendan.org all rights reserved

designed and developed by AVESTA GROUP