"مامۆستایەك لە بری ئەوەی سكاڵاكەی لێبوەربگیرێت، هەڕەشەی لێكراوە"
یەكێتی مامۆستایان: لێپێچینەوە لەو كەسانە ناكرێت كە هێرشیان كردەسەر مامۆستایان و فەرمانبەران

- 4/15/2018 11:17:00 AM 3173 جار خوێندراوەتەوە

خەندان- سالار محەمەد

ئەندامێكی سكرتاریەتی یەكێتی مامۆستایانی كوردستان رایدەگەیەنێت، دەسەڵات لە هەولێر و دهۆك نەیتوانیووە لێپێچینەوە لەو كەسانە بكات، كە هێرشیان كردە سەر مامۆستایان و فەرمانبەرانی خۆپیشاندەر و یاری بە دۆسییەكانیان دەكەن.

بەرهەم مستەفا، بە خەندان-ی راگەیاند، وەكو یەكێتی مامۆستایانی كوردستان هەردوو لقی مامۆستایانی هەولێر و دهۆكیان ئاگاداركردووەتەوە، هەرمامۆستایەك لەكاتی خۆپیشاندانەكاندا هێرشی كرابێتەوە سەر دەتوانێت لە لقەكانی یەكێتی مامۆستایان لە هەولێرو دهۆك سكاڵا  تۆماربكات.

بەرهەم مستەفا ئاماژەی بەوەشكرد، "یەكێك لەو مامۆستایانەی كە لە هەولێر هێرشی كرابووە سەر، بەمەبەستی تۆماركردنی سكاڵا سەردانی یەكێك لە بنكەكانی پۆلیسی كردبوو، لە بری ئەوەی سكاڵاكەی لێبوەربگیرێت، هەڕەشەی لێكرابوو".

18ی مانگی (ئازار/3)ی رابردوو خۆپیشاندانی ناڕەزایی لە بەشێك لە شارو شارۆچكەكانی هەرێمی كوردستان دژی سیستمی پاشەكەوتكردنی مووچەی فەرمانبەران بەڕێوەچوو، لە هەولێر و دهۆك هێزە ئەمنییەكان هێرشیانكردەسەر خۆپیشاندەران و چەندین خۆپیشاندەریان بە گوللەی پلاستیكی برینداركرد.

بەرهەم مستەفا وتیشی، "تا ئێستا دەسەڵات لە هەولێر و دهۆك نەیتوانیووە لێپێچینەوە بكات لەو كەسانەی كە لەكاتی خۆپیشاندانەكاندا هێرشیان كردبووە سەر مامۆستایان، دەسەڵات یاری بەو دۆسیانە دەكات، ئەوەش لە كاتێكدایە ئەو كەسانەی كە هێرشەكانیان ئەنجامداوە هەموویان ناسراون".


Copyright © 2016 Xendan.org all rights reserved

designed and developed by AVESTA GROUP