بەپەلە

لە 2017 دا كوردستان دوو سەركردەی لەدەستدا

- 1/1/2018 1:31:00 AM 6439 جار خوێندراوەتەوە
نەوشیروان مستەفا و مام جەلال

خەندان-

لەساڵی 2017 دا دووسەركردەی كوردستان كۆچی دوایی-یان كرد، ئەوانیش جەلال تاڵەبانی، سەرۆك كۆماری پێشووی عێراق و سكرتێری گشتی یەكێتی نیشتیمانی كوردستان و نەوشیروان مستەفا ئەمین رێكخەری گشتی بزووتنەوەی گۆڕان بوون.

خەندان پانۆرامای رووداوەكانی ساڵی 2017ی بڵاوكردەوە، كە گرنگترینیان كۆچی دوایی دوو سەركردەی گەلی كورد بوون.

19ی مانگی (ئایار/5)ی ساڵی 2017، نەوشیروان مستەفا ئەمین، رێكخەری گشتی بزوتنەوەی گۆڕان لە شاری سلێمانی لە ماڵەكەی خۆیدا لەتەمەنی 73ساڵیدا بەهۆی نەخۆشییەوە كۆچی دوایی كرد.

كێشەی تەندروستی نەوشیروان مستەفا كە بەهۆیەوە چووبووە دەرەوەی وڵات، پەیوەندیداربوو بە نەشتەرگەرییەك كە ساڵی 1987 لە ئەڵمانیا بۆی ئەنجامدرابوو.

نەوشیروان مستەفا لەكتێبی خولانەوە لەناو بازنەدا دەگێڕێتەوە، ساڵی 1986 بەدەست ئازاری پشتیەوە ناڵاندویەتی‌و پەرێشان بووە، دواتر لەسەر داوای مام جەلال چووەتە دەرەوەی وڵات بۆ ئەنجامدانی‌ نەشتەرگەری‌.

هاوكات مام جەلال تاڵەبانی دوای زیاتر لە 70 ساڵ لە خەباتی سیاسیی، رۆژی 3ی مانگی (تشرینی یەكەم/10) لە تەمەنی 84 ساڵیدا لە بەرلین بەهۆی نەخۆشییەوە كۆچی دوایی كرد.

مام جەلال تاڵەبانی، سەرۆك كۆماری پێشووی عێراق و سكرتێری گشتی یەكێتی نیشتمانی كوردستان بوو.

 

تاڵەبانی لە كۆتایی ساڵی 2012 دا تووشی جەڵتەی مێشك بوو، كاتێك لە شوێنی مانەوەی خۆی بوو لە بەغدا كە ئەوكات سەرۆك كۆماری عێراق بوو.

بەمەبەستی پشكنینی پزیشكی تاڵەبانی بۆ ئەڵمانیا گوێزرایەوە، پاش پشكنینی پزیشكی و  مانەوەی بۆ ماوەیەكی درێژ لەبەرلینی پایتەختی ئەو وڵاتە، لە مانگی (تەمموز/7)ی ساڵی 2014 دا گەڕایەوە هەرێمی كوردستان.



Copyright © 2016 Xendan.org all rights reserved

designed and developed by AVESTA GROUP