لەدوای خۆی دوو منداڵی بەجێهێشت
رێبوار لەرۆژی گەڕانەوەیدا شەهیدبوو

- 11/19/2017 3:06:00 PM 24465 جار خوێندراوەتەوە

خەندان-فەریق حەبیب

شەهید رێبوار خۆی ئامادەكردبوو كە بگەڕێتەوە بۆ لای ماڵ و منداڵەكەی، بەڵام لەو رۆژەدا بۆمبێكی داعش كۆتایی بەژیانی خۆی و سێ هاوسەنگەری هێنا.

شەهید رێبوار عوسمان عەبدوڵا (23 ساڵ) لەیەكێك لەئۆردوگاكانی ئێران لەدایك بووە لەكاتی كۆڕەوەكەدا. تا پۆلی شەشەمی سەرەتایی خوێندووە. لەساڵی 2013 بووەتە پێشمەرگە، دوا شوێنی پێشمەرگایەتی لیوای 136ی سەر بەهێزەكانی 70 بووە. رۆژی 28/8/2014 لەجەلەولا لەگەڵ سێ‌ هاوسەنگەری بەهۆی تەقینەوەی بۆمبێكی داعشەوە شەهیدبوو.

شەهید دایك‌و باوكی ماوە، دوو خوشك‌و پێنج برای هەیە، شەهید برا بچووكی خێزانەكەی بوو. شەهید لەدوای خۆی دوو منداڵی بەناوەكانی سەناریا (6) ساڵ، هاوڕێ‌ (4) ساڵ بەجێهێشت.

غەریب لەدایكبووی (1983) برای شەهید، باس لەوەدەكات كە بۆ دواجار شەهید رێبواری دوو رۆژ بەر لەشەهیدبوونی بینیوە "ئەو ئەگەرچی هاوسەرگیریی كردبوو و دوو منداڵیشی هەبوو، بەڵام هەر لەگەڵ ماڵی باوكم ئەژیا، منیش هەر لەوێ‌ دەژیام، دواینجاریش هەر لەوێ‌ بینیم، ئەو باسی لە بۆسەیەكی داعش دەكرد لەشارۆچكەی جەلەولا، كە تێیدا دوو هاوسەنگەری شەهیدبوون، زۆر خەمباربوو بۆیان".

بۆ دواجار شەوی بەر لەشەهیدبوونی، غەریب چەند جارێك بەتەلەفۆن قسەی لەگەڵ رێبواری برای كردووە"نزیكەی سەعات 10ی شەو بوو قسەم لەگەڵ كرد تا سەعات 12ی شەو من‌و براكانم چەند جارێك قسەمان لەگەڵی كرد، وتم كەی ئەگەڕێیتەوە، شەهید رێبوار باسی لەوەكرد كە سبەی دێتەوە، بەداخەوە تەرمەكەی گەڕایەوە".

غەریب بۆ بەیانییەكەی واتە رۆژی شەهیدبوونی رێبوار، سەعات 12ی نیوەڕۆ چەند جارێك تەلەفۆنی بۆكرد، بەڵام وەڵامی نەبوو، نزیكەی سەعات 3 ش چەند جارێك تەلەفۆنی بۆكرد، هەر وەڵامی نەبوو. 

"هەموومان دڵمان لای بوو، دایكم وتی دڵنیام شەهیدبووە ئێوە پێم ناڵێن، پێمووت نەخێر هیچی لێنەهاتووە، ئیتر زۆری پێنەچوو، نزیكەی سەعات 4ی ئێوارە بوو كاتێك هاوڕێیەكی شەهید تەلەفۆنی بۆ یۆسف-ی برام كردبوو و پێی راگەیاندبوو كە رێبوار شەهیدبووە، ئەویش بەئێمەی وت".

غەریب بەپشت بەستن بەو زانیارییانەی لەهاوسەنگەرانی رێبوارەوە وەریگرتووە، ئاماژەی بەوەكرد كە لەگەڕەكی حوسێنییەی شارۆچكەی جەلەولا بۆمبێك تەقیوەتەوەو لەئاكامدا جگە لەشەهید رێبوار، دوو ئەفسەری تر بەناوەكانی مولازم چۆمان‌و رائید حەسەن شەهیدبوون.

شەهید رێبوار زۆر حەزیكردووە ببێتە كارمەندی ئاسایش‌و بەشداریبكات لەجێگیركردنی ئاسایش‌و ئارامی بۆ وڵاتەكەی"رێبوار كەسێكی نیشتمانپەروەر بوو، ئەو حەزی ئەكرد دوای تەواوبوونی ئەركی پێشمەرگایەتی ببێت بەكارمەندی ئاسایش، تەنانەت قسەی لەگەڵ بەرپرسێكی باڵای ئاسایش كردبوو لەوبارەیەوە، بەڵام بەداخەوە شەهیدبوو و ئەو حەزەی نەهاتەدی".

"ئەگەرچی شەهیدبوونی رێبوار بۆ بنەماڵەكەمان كارەساتێكی گەورە بوو، بەڵام شانازی بەوەوە دەكەین كە لەپێناو خاكی كوردستان شەهیدبووە، بڕوابكەن من حەزم ئەكرد لەجێی رێبوار من شەهیدبوومایە"، غەریب وایوت.

غەریب باس لەوەدەكات كە دایكی شەهید، بەشێوەیەكی ئەوتۆ شەهیدبوونی كوڕەكەی كاری تێكردووە كە ئۆقرەی لێبڕاوە‌و هەموو رۆژانێكی پێنجشەممە سەردانی گۆڕەكەی دەكات‌و بەو جۆرەش كەمێك لەئازارو خەمەكانی بەشێوەیەكی كاتیی كەم دەبێتەوە.

رێبوار ساڵی 2010 هاوسەرگیری كرد، ژیان عیزەدین هاوسەری شەهید باس لەوەدەكات دوو رۆژ بەر لەشەهیدبوونی هاوسەرەكەی بینیووە "ئەو رۆژە ئەركی خۆیشی نەبوو، بەڵام مولازم چۆمان بەدوایدا هات ‌و رۆیشتنەوە بۆ دەوام، ئەوە دواجار بوو كە بینیم".

"رۆژی بەر لە شەهیدبوونیشی دوای سەعات 12ی نیوەڕۆ تەلەفۆنم بۆ كرد، پاش هەواڵپرسین، وتی وەزع ئارامەو هیچ نییە، وتم بۆ مۆڵەت وەرناگریت‌و بگەڕێیتەوە، وتی بەیانی ئەركەكەم تەواو دەبێت‌و دەگەڕێمەوە، پێویست ناكات مۆڵەت وەربگرم"، هاوسەری شەهید وایوت.

"ساڵی 2010 هاوسەرگیریمان كرد، نێوانمان لەگەڵ شەهید زۆر باش بوو، ئەو حەزی لەگەڕان‌و چوونەدەرەوە، هیچ كێشەیەكی ئەوتۆمان نەبوو، بەڵام بەداخەوە شەڕی داعش ژیانی تێكداین".

لەئێستادا خێزانی شەهید لەگەڵ غەریب-ی برای شەهید دەژین‌و لەخانووی ماڵی باوكی شەهید نیشتەجێن، سەناریا ئەمساڵ یەكەم ساڵی خوێندنیەتی.

ماڵی شەهید لەگەڕەكی شۆڕش-ی شاری كەلارە، گۆڕەكەشی لەگۆڕستانی عەبدولڕەحمان-ی هەمان شارە.
 


Copyright © 2016 Xendan.org all rights reserved

designed and developed by AVESTA GROUP