بەپەلە

ئامەد؛ 30 ئەندامی دەبەپە دەستگیركران

- 11/12/2017 8:33:00 PM 2261 جار خوێندراوەتەوە

خەندان- خۆشناو حسێن

هێزە ئەمنییەكانی توركیا بەیانی ئەمڕۆ یەكشەممە لە ئۆپەراسیۆنێكدا لە ناوچەی بیسمیل-ی سەر بە پارێزگای ئامەد لە باكوری كوردستان 30 كەسیان دەستگیرکردووە، لە نێویاندا هاوسەرۆكی شارەوانی شارۆچكەی بیسمیل.

بە پێی هەواڵێکی ئاژانسی میزۆپۆتامیا، ئەمڕۆ پۆلیسی توركیا هەڵیکوتاوەتە سەر ماڵی ئەندامانی پارتی هەرێمەكانی دیموكرات (دەبەپە) و لە ئاکامدا 30 ئەندامی ئەو پارتەیان دەستگیركردوە.

لەنێو دەستگیرکراوەکاندا عەلی چەلیك هاوسەرۆكی دوورخراوەی شارەوانی بیسمیل و شێخموس ئایدن جێگری هاوسەرۆكی شارەوانی و جەلیلە كاپلان هاوسەرۆكی دەبەپە-ی ناوچەكە  و ژمارەیەكی زۆر لە ئەندامی دەبەپە لەو ناوچەیەدا هەن. 

لە لایەكی ترەوە پۆلیسی توركیا لە گوندی "عەلی بەی" سەر بە شارۆچكەی بیسمیل، 9 ئەندامی ژن-ی دەبەپەی دەستگیركردوە و هەموویان گواسترانەتەوە شاری ئامەد.
لەکۆتایی ساڵی رابردووەوە تورکیا بەھەزاران ئەندام و سەرۆک شارەوانی و بەرپرس و پەرلەمانتاری ھەدەپەو بەدەپەی دەستگیرکردووە و تائێستاش ھەڵمەتەکە بەردەوامە.

لەو چوارچێوەیەشدا 55 پەرلەمانتاری ھەدەپە پارێزبەندی پەرلەمانتارییان لەسەر ھەڵگیراوە.

پاساوی تورکیا بۆ دەستگیرکردنی ئەو کەسانە، پڕوپاگەندەکردن و ئەندام بوونە لەپەکەکەو کەجەکە، بەڵام ئەوان تۆمەتەکان رەتدەکەنەوە.

ھەڵمەتەکانی دەستگیرکردن دوای دەستپێکردنی شەڕی چەکداری پەکەکەو تورکیا لەھاوینی 2015 و تێکچوونی پرۆسەی ئاشتی دەستیان پێکرد.



 


Copyright © 2016 Xendan.org all rights reserved

designed and developed by AVESTA GROUP