رزگار پێشبینی‌ شه‌هیدبوونی‌ كردبوو؛ به‌كه‌سوكاره‌كه‌ی‌ وت ره‌نگه‌ نه‌یانبینێته‌وه‌

- 8/29/2017 8:17:00 PM 29135 جار خوێندراوەتەوە
شه‌هید رزگار

خه‌ندان- فه‌ریق حه‌بیب

وه‌ك ئه‌وه‌ی‌ پێشبینی‌ شه‌هیدبوونی‌ كردبێت، یه‌كه‌م رۆژی‌ جه‌ژنی‌ قوربانی‌ 2014، رزگار سه‌رجه‌م خزم و كه‌سوكاره‌كه‌ی‌ به‌سه‌ركرده‌وه‌و پێی وتن ده‌چێته‌وه‌ بۆ ده‌وام و ره‌نگه‌ جارێكی‌ تر نه‌یان بینێته‌وه‌، هه‌رواش بوو ئه‌و بۆ دواجار رۆیشت و جارێكی‌ تر نه‌گه‌ڕایه‌وه‌.

شه‌هید رزگار ئه‌حمه‌د حه‌مه‌ساڵح له‌ساڵی‌ 1965 له‌پێنجوێن له‌دایكبووه‌. خانه‌ی‌ مامۆستایانی‌ ته‌واوكردووه‌. له‌ساڵانی‌ هه‌شتاكانه‌وه‌ تێكه‌ڵ به‌كاری‌ سیاسی‌ بووه‌و په‌یوه‌ندیكردووه‌ به‌ڕێكخستنه‌كانی‌ یه‌كێتی‌ نیشتمانی‌ كوردستانه‌وه‌.

ئه‌و له‌ساڵی‌ 2003 بووه‌ته‌ پێشمه‌رگه‌، دوا شوێنی‌ پێشمه‌رگایه‌تی‌ به‌شی‌ كه‌مئه‌ندامانی‌ سه‌نگه‌ر له‌ فه‌رمانده‌یی‌ گشتی‌ هێزی‌ پێشمه‌رگه‌ی‌ كوردستان بووه‌. رۆژی‌ 12/10/2014 به‌هۆی‌ ته‌قینه‌وه‌یه‌كه‌وه‌ له‌قه‌ره‌ته‌په‌ له‌گه‌ڵ نۆ هاوسه‌نگه‌ری‌ تری‌ شه‌هیدبوو.

شه‌هید دوو خوشك‌و یه‌ك برای‌ هه‌یه‌، باوكیشی‌ شه‌هیده‌و دایكی‌ له‌ژیاندا ماوه‌، مامێكیشی‌ شه‌هیدبووه‌.

زارا محه‌ممه‌د له‌دایكبووی‌ (1980) له‌ساڵی‌ 2006 له‌گه‌ڵ شه‌هید رزگار هاوسه‌رگیریی كردووه‌، دوو كچ‌و كوڕێكیان هه‌یه‌ به‌ناوه‌كانی‌ ره‌یان له‌دایكبووی‌ (2007)، محه‌ممه‌د له‌دایكبووی‌ (2012)، رۆژین له‌دایكبووی‌ (2014)، كه‌ 25 رۆژ به‌ر له‌شه‌هیدبوونی‌ باوكی‌ له‌دایكبووه‌.

زارا دووه‌م رۆژی‌ جه‌ژنی‌ قوربانی‌ 2014 بۆ دواجار نۆ رۆژ به‌ر له‌شه‌هیدبوونی‌ هاوسه‌ره‌كه‌ی‌ بینیوه‌ "كه‌ رۆیشته‌وه‌ ئیتر نه‌مبینییه‌وه‌".

رزگار یه‌كه‌م رۆژی‌ جه‌ژن ماڵی‌ زۆربه‌ی‌ خزم‌و دۆستان گه‌ڕابوو، گه‌ردن ئازادی‌ لێكردبوون، پێی‌ وتبوون ده‌چێته‌وه‌ بۆ ده‌وام ره‌نگه‌ ئیتر نه‌یه‌ته‌وه‌و نه‌یان بینێته‌وه‌.

زارا ده‌ڵێت "لای‌ زۆر كه‌س ئه‌وه‌ی‌ وتبوو، پێده‌چێت پێشبینی‌ شه‌هیدبوونی‌ خۆی‌ كردبێت، چونكه‌ چه‌ند رۆژێك به‌ر له‌وه‌ی‌ بچێته‌وه‌ بۆ ده‌وام حاڵه‌تێكی‌ نائاسایم تێدا به‌دیكردبوو، له‌هیچ شوێنێك ئۆقره‌ی‌ نه‌ئه‌گرت، خۆشی‌ ئه‌یوت نازانم بۆ وام لێهاتووه‌، ناتوانم له‌هیچ شوێنێك ئارام بم، هه‌ستێكی‌ سه‌یرم هه‌یه‌".

كه‌ رزگار ده‌چێته‌وه‌ بۆ به‌ره‌كانی‌ شه‌ڕ، زارا هه‌ر دڵی‌ لای‌ ده‌بێت، به‌رده‌وام پێكه‌وه‌ قسه‌یان ده‌كرد، "ئه‌و ئه‌گه‌رچی‌ هه‌ستی‌ به‌وه‌ده‌كرد كه‌شتێك رووده‌دات، به‌ڵام كه‌ قسه‌مان ئه‌كرد هه‌وڵی‌ ده‌دا دڵم بداته‌وه‌، قسه‌ی‌ خۆشی‌ بۆ ئه‌كردم‌و ده‌یوت زۆر بیرتان ئه‌كه‌م‌و چه‌ند رۆژێكی‌ تر دێمه‌وه‌‌و ناوی‌ رۆژین ئه‌نێین‌و خزمان بانگهێشت ده‌كه‌ین، چونكه‌ هێشتا ناومان نه‌نابوو".

 شه‌وی‌ به‌ر له‌شه‌هیدبوونی‌ تا كاتژمێر 10:00ی‌ شه‌و پێكه‌وه‌ قسه‌یان كرد، رزگار پێی وت كه‌ دوو رۆژی‌ تر دێته‌وه‌.

رزگارو محه‌مه‌دی‌ كوڕی‌

 

ئه‌و رۆژه‌ی‌ رزگار تێیدا شه‌هیدبوو، زارا تا نزیكه‌ی‌ كاتژمێر 10:00ی‌ پێشنیوه‌ڕۆ چه‌ند جارێك ته‌له‌فۆنی‌ بۆكرد، به‌ڵام وه‌ڵامی‌ نه‌بوو، كاتێك له‌ته‌له‌فزیۆنه‌وه‌ هه‌واڵی‌ روودانی‌ ته‌قینه‌وه‌یه‌كی‌ له‌قه‌ره‌ته‌په‌ بیست زارا ته‌واو نیگه‌ران بوو "پاشنیوه‌ڕۆكه‌ی‌ هه‌واڵی‌ برینداربوونیمان پێگه‌یشت، دواتریش ئاگاداریان كردینه‌وه‌ كه‌ شه‌هیدبووه‌".

ئه‌و كاته‌ی‌ هه‌واڵه‌كه‌ به‌زارا گه‌یه‌نرا مۆبایله‌كه‌ی‌ له‌ده‌ست به‌ربووه‌وه‌، دنیای‌ له‌به‌رچاو ره‌ش بوو.

شه‌هیدبوونی‌ رزگار، كاریگه‌رییه‌كی‌ گه‌وره‌ی‌ له‌سه‌ر ته‌واوی‌ بنه‌ماڵه‌كه‌ی‌ دروستكرد، به‌تایبه‌تی‌ هاوسه‌رو منداڵه‌كانی‌، زارا ده‌ڵێت "له‌دوای‌ شه‌هیدبوونی‌ باوكیانه‌وه‌ مناڵه‌كانمان باری‌ ده‌روونییان زۆر خراپه‌".

محه‌مه‌دی‌ كوڕی‌ به‌رده‌وام ئه‌ڵێت "دایكه‌ باوكم بۆ نایه‌ته‌وه‌؟ ئیتر سه‌ره‌ی‌ تۆیه‌ بمریت تۆ بڕۆ با ئه‌و بێته‌وه‌. ناشزانێت مردن چییه‌، به‌ڵام ئه‌زانێت كه‌ باوكی‌ ونه‌".

محه‌مه‌د كه‌ له‌خوێندنگه‌یه‌كی‌ نێوده‌وڵه‌تییه‌، ساڵی‌ رابردوو هه‌موو رۆژێك به‌گریانه‌وه‌ ده‌گه‌ڕایه‌وه‌ ماڵه‌وه‌ "ئه‌یوت دایكه‌ بۆ مناڵه‌كانی‌ تر باوكیان دێت به‌شوێنیاندا‌و ماچی‌ مناڵه‌كانی‌ خۆیان ئه‌كه‌ن ماچی‌ من ناكه‌ن؟ به‌ڕاستی‌ ئه‌و زۆر ناڕه‌حه‌تی‌ كردووین". 

هه‌روه‌ها ره‌یان-ی‌ كچیشی‌ شه‌هیدبوونی‌ باوكی‌ زۆر كاری تێكردووه‌، ئه‌و هه‌رچه‌نده‌ زیره‌كه‌ له‌قوتابخانه‌، به‌ڵام مامۆستاكانی‌‌و توێژه‌ره‌ كۆمه‌ڵایه‌تییه‌كه‌یان باس له‌وه‌ده‌كه‌ن كه‌ زۆر ماته‌‌و به‌كه‌می تێكه‌ڵی‌ خوێندكاره‌كانی‌ تر ده‌بێت‌و هه‌ندێك جار ده‌گری ‌و هاوپۆله‌كانی‌ لێی‌ كۆده‌بنه‌وه‌، زۆرجاریش هه‌ر به‌ته‌نها پیاسه‌ده‌كات له‌گۆڕه‌پانی‌ قوتابخانه‌كه‌یدا، به‌ڵام ئێستا وه‌ك دایكی‌ باسیده‌كات كه‌مێك باشتر بووه‌.

رزگارو ره‌یانی‌ كچی‌

 

شه‌هیدبونی‌ رزگار، كاریگه‌ری‌ زۆری‌ له‌سه‌ر دایكی‌ به‌جێهێشتووه‌و به‌هۆی‌ زۆری‌ گریانییه‌وه‌ بۆ كوڕه‌كه‌ی‌ چاوه‌كانی‌ به‌ته‌واوی‌ لاواز بووه‌.

فاتمه‌، خوشكی‌ شه‌هید باس له‌وه‌ده‌كات، زۆری‌ نه‌ماوه‌ دایكی‌ چاوه‌كانی‌ له‌ده‌ستبدا، چونكه‌ زۆر گریاوه‌ بۆ رزگار.

فاتمه‌ خۆشی‌ كاتێك هه‌واڵی‌ شه‌هیدبوونی‌ رزگاریان پێداوه‌ تووشی‌ شۆك بووه‌، چه‌ند رۆژێك له‌نه‌خۆشخانه‌ی‌ فریاكه‌وتنی‌ سلێمانی‌ چاره‌سه‌ری‌ وه‌رگرت، "ئێستاشی‌ له‌گه‌ڵدا بێت، زۆربه‌ی‌ كاته‌كان ده‌گرین، جارێكیان له‌به‌ر لێزمه‌ی‌ باران ئه‌وه‌نده‌ گریام ئاگام له‌خۆم نه‌مابوو، باری‌ ده‌روونیم زۆر خراپ بوو، به‌ڵام هه‌رچۆنێك بێت ناچارین درێژه‌ به‌ ژیان بده‌ین‌و له‌گه‌ڵ ئه‌و خه‌مه‌ گه‌وره‌یه‌دا خۆمان بگونجێنین".

خه‌ندان زۆر هه‌وڵیدا هاوسه‌نگه‌رێكی‌ رزگار بدۆزیته‌وه‌ كه‌شایه‌تحاڵی‌ چۆنیه‌تی‌ شه‌هیدبوونی‌ بێت، به‌ڵام هه‌وڵه‌كان بێ ئه‌نجام بوون، به‌و پێیه‌ی‌ وه‌ك كه‌سوكاره‌كه‌ی‌ باسی ده‌كه‌ن رزگارو هاوسه‌نگه‌ره‌كانی‌ سه‌رجه‌میان پێكه‌وه‌ شه‌هیدبوون.

به‌ختیار له‌دایكبووی‌ (1956) برای‌ شه‌هید له‌ماوه‌ی‌ ئه‌و رۆژانه‌ی‌ رزگاری‌ برای‌ له‌ ئه‌ركدا بووه‌ له‌قه‌ره‌ته‌په‌، به‌رده‌وام پێكه‌وه‌ به‌ته‌له‌فۆن قسه‌یان كردووه‌.

رزگارو به‌ختیار

دواجار رۆژی‌ پێش شه‌هیدبوونی‌ به‌ختیار قسه‌ی‌ له‌گه‌ڵ براكه‌ی‌ كرد، "پێیوتم پێویستناكات ئه‌زیه‌ت بكێشیت‌و ئه‌وه‌نده‌ ته‌له‌فۆن بكه‌ی‌، دڵت لام نه‌بێت، دوو رۆژی‌ تر دێمه‌وه‌، ئیتر گوێم له‌ده‌نگی‌ نه‌بووه‌وه‌".

كاتژمێر 10 ی‌ پێشنیوه‌ڕۆی‌ ئه‌و رۆژه‌ی‌ كه‌ رزگار شه‌هیدبوو، به‌ختیار هه‌ر دڵی‌ له‌لای‌ رزگاری‌ برای‌ بوو، چه‌ند جارێك په‌یوه‌ندی‌ پێوه‌كرد، به‌ڵام وه‌ڵامی‌ نه‌بوو، به‌په‌له‌ چووه‌وه‌ بۆ ماڵ‌و چووه‌ لای‌ مامه‌كانی‌ بۆ ئه‌وه‌ی‌ پێكه‌وه‌ چاره‌نوسی‌ رزگار بزانن.

ئه‌وان هه‌ر به‌رده‌وام بوون له‌ته‌له‌فۆن كردن، تا كه‌سێك وه‌ڵامی‌ دایه‌وه‌و پێی وتن رزگار برینداربووه‌، پاشان كه‌سێك راستی‌ شه‌هیدبوونی‌ به‌مامی‌ راگه‌یاند.

شه‌هید رزگارو به‌ختیاری‌ برای‌ یه‌كتریان زۆر خۆشده‌ویست، وه‌ك به‌ختیار ده‌ڵێت "تا ئه‌وكاته‌ی‌ شه‌هید بوو گیرفانمان یه‌ك بوو. ئه‌و كه‌سێكی‌ زۆر به‌خشنده‌بوو، حه‌زی‌ له‌كاری‌ خێرخوازیی‌ بوو، هه‌موو ئه‌وانه‌ی‌ هاتوچۆی‌ مزگه‌وتی‌ دارۆغایان ده‌كرد شایه‌دی‌ ئه‌وه‌ی‌ بۆ ده‌ده‌ن كه‌ چه‌ند به‌ته‌نگ خه‌ڵكی‌ هه‌ژاره‌وه‌ بوو. په‌یوه‌ندی‌ كۆمه‌ڵایه‌تیشی‌ تابڵێی‌ فراوانبوو، به‌شداری‌ خۆشی‌‌و ناخۆشی‌‌و پرسه‌ی‌ خزم‌و دۆستانی‌ ئه‌كرد".

دووه‌م رۆژی‌ پرسه‌كه‌ی‌، كه‌سێك له‌قه‌ره‌ته‌په‌وه‌ كاتژمێرو پاره‌و مۆبایله‌كه‌ی‌ رزگاری‌ بۆ خانه‌واده‌ی‌ هێنایه‌وه‌.

به‌گوێره‌ی‌ گێڕانه‌وه‌كه‌ی‌ ئه‌و و چه‌ند كه‌سێكی‌ تر، ئه‌وان له‌ناو باره‌گاكه‌ی‌ خۆیاندا بوون له‌قه‌ره‌ته‌په‌، خۆكوژێكی‌ داعش به‌ئۆتۆمبێلێكی‌ بۆمبڕێژكراوه‌وه‌ خۆی‌ كردووه‌ به‌باره‌گاكه‌یانداو خۆی‌ ته‌قاندووه‌ته‌وه‌، به‌هۆیه‌وه‌ رزگارو نۆ كه‌س له‌هاوسه‌نگه‌رانی‌ شه‌هیدبوون.

ماڵی‌ شه‌هید له‌ئێستادا له‌گه‌ڕه‌كی‌ راپه‌ڕینی‌ شاری‌ سلێمانییه‌‌و له‌گه‌ڵ ماڵی‌ دایكی‌ شه‌هید ده‌ژین، گۆڕی‌ شه‌هیدیش له‌گۆڕستانی‌ گردی‌ سه‌یوانی‌ هه‌مان شاره‌.



Copyright © 2016 Xendan.org all rights reserved

designed and developed by AVESTA GROUP