xendan ads

لەگەڵ 24 هاوسەنگەریدا پێكەوە شەهیدبوون
كاروان چوار مانگ پێش لەدایكبوونی منداڵەكەی شەهیدبوو

- 7/6/2017 9:58:00 PM 35511 جار خوێندراوەتەوە
شەهید كاروان و دایكی

خەندان-

شەوێكی ساردی زستانی 2015، كاروان و هاوسەنگەرەكانی لەمیحوەری گوێڕ كەوتنە بۆسەی چەكدارانی داعشەوەو تابەرەبەیان بەرگرییەكی سەختیان كرد، پێش ئەوەی 24 كەسیان شەهیدبێت كە كاروان یەكێك بوو لەوان و پاش برینداربوونی بەسەختی شەهیدبوو.

شەوی‌ 10-1-2015 داعش لەمیحوەری‌ گوێر هێرشیكردە سەر سەنگەرەكانی‌ پێشمەرگە لەگوندی‌ كەنهەش، ئەوشەوە هێزێكی‌ ئاسایشی‌ هەولێر كە بۆ بەرگری‌ چوبوونە سەنگەرەكانی‌ پێشەوە كەوتنە بۆسەیەكی‌ چەكدارانی‌ داعشەوە.

پێش هێرشەكەی داعش، بەشێكی زۆر دانیشتوانەكەی ناحیەی گوێڕیان جێهێشت، پاش ئەوەی هەواڵی ئەوەیان بیستبوو كە داعش هێزێكی زۆری كۆكردووەتەوەو دەیەوێت هێرش بكاتە سەر ناحیەكە.

نەقیب رێبین محەمەد، لەهێزی‌ تایبەت بۆ خەندان باسیلەوەكرد، رۆژی‌9-1-2015 زانیارییان پێگەیشتووە كە چەكدارانی‌ داعش بەنیازن لەگووندی‌ كەنهەش-ی‌ ئەو بەری‌ زێی‌ گەورە بپەڕنەوە بۆ ئەمبەر‌و پەلاماری‌ ناحیەی‌ گوێڕ‌و ناوچەكانی‌ دەوروبەری‌ بدەن. 

بەوتەی‌ ڕێبین، ئەوشەوە بەشێك لەخەڵكی‌ گوێڕ شارۆچكەكەیان جێهێشتووە، كاتێك هێزەكانی‌ پێشمەرگەو ئاسایش پرسیاریان لێكردوون، بۆ دەڕۆن؟ دەڵێن لەگوندی‌ كەنهەش-ەوە تەلەفۆنیان بۆكراوە كەداعش هێزێكی‌ زۆری‌ كۆكردووەتەوەو پەلاماری‌ گوێڕ دەدات، هەربۆیە هێزی‌ تایبەت بەهەموو هێزەكانی‌ رادەگەیەنێت كەداعش هێرشدەكات.

پێش نیوەشەو داعش هێرشەكەی‌ دەستپێكرد، نەقیب رێبین ‌و 16 پێشمەرگەی‌ تر لەنزیك پردی‌ كەپران، دەكەونە شەڕ لەگەڵیان، چونكە داعش بەنیازبووە پردەكە بتەقێنێتەوە، ئەوەشیان لەئامێرە بێتەلەكانەوە زانیوە كاتێك چەكدارانی‌ داعش قسەیان لەگەڵ یەكتركردووە.

رێبین باسیلەوەكرد، تا كاتژمێر شەشی‌ بەیانی‌ بەرگرییان لەپردەكە كردووە، بەرەبەیانی‌ كاتێك گەیشتوونەتە سەر پردەكە بینویانە 28 كەس شەهیدبوون كەزۆربەیان لەهێزەكانی‌ ئاسایش بوون، هەروەها دوو تەرمی‌ چەكدارانی داعش لەنزیكیان بەجێمابوو.

بەگوێرەی‌ لیستێكی‌ تایبەت بەشەهیدانی‌ شەڕی‌ داعش كە لەلایەن وەزارەتی‌ پێشمەرگەوە ڕێكخراوە، 24 كارمەندی‌ ئاسایش لەناو ئەو شەهیدانەدابوون. كە یەكێك لەوانە كاروان بوو.

رێبین، هۆكاری‌ شەهیدبوونی‌ پێشمەرگەو ئاسایشەكانی‌ لەوشەوەدا بۆ ئەوەگەڕاندەوە كە زۆربەی‌ ئەو كەسانە سەر بەبنكەكانی‌ ئاسایشی‌ شاری‌ هەولێربوون، لەبەرئەوەی‌ بەباشی‌ شارەزای‌ ناوچەكە نەبوون كەوتوونەتە بۆسەی‌ داعشەوە لەسەر پردەكە‌و شەهیدبوون.

"لەبری‌ ئەوەی‌ لەكاتی‌ پاشەكشەكردندا بەرەو ناوچەی‌ مەلاقەرە بڕۆن بەرەو كەپران چووبوون ‌و لەلایەن داعشەوە شەهیدكرابوون، تەنها چوار ئاسایش ڕزگاریان بوو"، رێبین محەمەد وایوت.

شەهید كاروان مامەند حامید لەساڵی 1991 لەشاری هەولێر لەدایكبووە. تا قۆناغی سەرەتایی خوێندووە. لەساڵی 2013 بووەتە كارمەندی ئاسایش لەبەڕێوەبەرایەتی ئاسایشی هەولێر‌و تاكاتی شەهیدبوونی لەهەمان بەڕێوەبەرایەتی بووە. بەرەبەیانی 10/1/2015 لەمیحوەری گوێر لەگەڵ ژمارەیەك لەهاوسەنگەرەكانی شەهیدبووە.

شەهید پێنج براو دوو خوشكی هەیە، باوكی لەژیاندا ماوە، بەڵام دایكی دوای نزیكەی دوو مانگ لەشەهیدبوونی كاروان، كۆچی دوایی كردووە.

ئەو شەوەی كاروان تێیدا شەهیدبوو، دایكی وەك ئەوەی دڵی خەبەری دابێت، داوای لەهیمدادی كوڕی كرد تەلەفۆن بۆ كاروان بكات، چونكە دڵی زۆر لەلای بوو.

هیمداد لەدایكبووی (1988) برای شەهید كاروان كە توێژەری كۆمەڵایەتییە، ئەو شەوەی براكەی تێیدا شەهیدبوو، چەند جارێك بەتەلەفۆن قسەی لەگەڵكردووە، "سەعات 10ی شەو بوو كاتێك دایكم وتی زۆر دڵم لای كاروانە‌و هەست بەشتێكی خراپ دەكەم تەلەفۆنی بۆبكەن بزان باشە، كە تەلەفۆنمان بۆكرد وتی هیچ لەگۆڕێ‌ نییە‌و دڵتان لام نەبێت، تا 12ی شەو چەند جارێك قسەمان لەگەڵ كرد وتی هیچ نییە".

شەهید كاروان لەگەڵ هیمدادی برای

 پێش كاتژمێر یەكی شەو، كاروان خۆی تەلەفۆن بۆ هیمداد دەكاتەوە "زانیم شتێكی نائاسایی هەیە‌و یەكسەر نیگەران بووم‌و وەڵامم دایەوە‌و وتی كەوتووینەتە ناو چەكدارانی داعش وەزعم خراپە برینداربووم، دوو گوللەم پێكەوتووە‌و زۆر سەرمامە خەریكە رەق دەبمەوە، وتم خۆڕاگربە ئێستا ئێمە دێین بەهاناتانەوە".

هەر دوابەدوای ئەو هەواڵە جەرگبڕە هیمدادو براكانی‌و ئامۆزاكانی‌و ژمارەیەكی زۆر لەخزمەكانیان بەچەكەوە لەهەولێرەوە بەرەو بەرەكانی شەڕ لەگوێڕ بەڕێدەكەون.

هیمداد وتی "زیاتر لە 10 ئۆتۆمبێل دەبووین، گەیشتینە بەرەكانی شەڕ، بەر لەوەی بگەینە پردی كەپران، هێزەكانی پێشمەرگە هاتنە پێشمان‌و پێیان وتین كە پردەكە بۆمبڕێژكراوەو داعش بەنیازە بیتەقێنێتەوە، ئەگەر بڕۆن مەترسی لەسەر ژیانی هەمووتان درووست دەبێت".

 بەناچاری هیمدادو خزمەكانی، لەوێ رادەوەستن و تا كاتژمێر پێنجی بەرەبەیان هەر لەگەڵ شەهید كاروان قسەیان كرد، "دیاربوو بەردەوام خوێنی لەبەر دەڕۆیشت".

 لەدوای كاتژمێر پێنجی بەرەبەیانەوە، ئیتر كاروان وەڵامی نەماو مۆبایلەكەشی داخرا. همیداد دەڵێت ئەوكاتە بێ‌ هیوابوون لەبەزیندوومانەوەی، چونكە بەردەوام تەرمی شەهید‌و بریندارەكان دەبرایەوە هەولێر.

وتیشی "پیكابێكی جۆری (بەهبەهان)مان بینی بەپەلە بەرەو هەولێر بەڕێكەوت، نەمانزانی كاروانی تێدایەو هێشتا گیانی تێداماوە، دواتر تەلەفۆنیان بۆكردین لەنەخۆشخانەوە وتیان تەرمی شەهید گەیشتووەتە نەخۆشخانەی رۆژئاوای هەولێر، ئەو هاوڕێیەی شەهید كە لەگەڵ تەرمەكەیدا بوو وتی تا بەردەم دەرگای نەخۆشخانەكەش هەر گیانی تێدا مابوو".

كاروان كاتێك رۆیشت بۆ بەرەی شەڕ، كاتی واجی خۆی نەبوو، بەخانەوادەكەی وت كە مادام بەڕێوەبەرەكەی ‌و هاوڕێكانی دەڕۆن، حەزدەكات لەگەڵ ئەوان بێت ‌و ناتوانێت لەماڵەوە بێت.

هیمداد وتی "براكەم وەكو هاوڕێمان وابوو، كەسێكی كۆمەڵایەتی‌و سادە بوو، زۆر لەسەرخۆ بوو. زۆر نیشتمان پەروەر بوو".

لەدەستدانی كاروان كەلێنێكی گەورەی خستە ناو خانەوادەكەیەوە، بەجۆرێك، تا دوو مانگ دوای شەهیدبوونیشی هەر پرسەیان دەگێڕا "شانازی پێوەدەكەین كە لەڕێی وڵاتدا شەهید بوو، ئەو رۆڵەی كوردستان بوو" هیمداد وایوت.

رۆژی پێش شەهیدبوونی، كاتێك كاروان لەماڵەوە بەڕێكەوت بۆ بەرەی شەڕو ماوەیەك لەماڵیان دوركەوتبووەوە، گەڕایەوە ماڵەوە، بۆ ئەوەی دوایین جار ماڵئاواییان لێبكات.

مریەم ئیسماعیل لەدایكبووی ساڵی (1996) لەساڵی 2011 هاوسەرگیریی لەگەڵ شەهید كاروان كردووە، دەڵێت "لەدوای بەڕێكەوتنی گەڕایەوە بۆ ماڵ‌و بەدایكی وت گەردنم ئازاد بكە، ئەمجارە نایەمەوە، پاشان هاتە سەرەوە بۆلای من‌و نێو چاوانمی ماچ كرد و پێی وتم ئاگات لەمنداڵەكەمان بێت".

منداڵەكەی شەهید كاروان

وتیشی "ئەو كات نەماندەزانی كوڕە یان كچە، ئەوەبوو چوار مانگ لەدوای شەهیدبوونی باوكی كچەكەمان كە ناوی كۆژینە لەدایكبوو، ئەو زۆر دڵی بەمنداڵەكەمان خۆش بوو، سێ‌ ساڵ بوو هاوسەرگیرمان كردبوو ".

ئەو شەوەی كاروان برینداربوو دواتر بەهۆیەوە شەهیدبوو، سێ جار لەگەڵ هاوسەرەكەی پێكەوە قسەیان كرد "سێ‌ جار تەلەفۆنم بۆكرد، لەبەر دڵی من دەیووت برینەكەم باشە نیگەران مەبە، سەعات 6ی بەیانی كوڕە خاڵێكم تەلەفۆنی بۆكردم‌و هەواڵی شەهیدبوونی كاروانی دامێ‌"، مریەم وادەڵێت.

ماڵی شەهید لەگەڕەكی خانزادی شاری هەولێرەو گۆڕی شەهیدیش لەگۆڕستانی شێخ ئەحمەدە لەشاری هەولێر.



Copyright © 2016 Xendan.org all rights reserved

designed and developed by AVESTA GROUP