xendan ads

په‌یامی‌ هاوخه‌می‌ تۆفیق شێخ تەیبی قەیوان بۆ كۆچی‌ دوایی‌ نه‌وشیروان مسته‌فا

- 5/19/2017 9:36:00 PM 11462 جار خوێندراوەتەوە
تۆفیق شێخ تەیبی قەیوان


خه‌ندان-

تۆفیق شێخ تەیبی قەیوان، په‌یامێكی‌ هاوخه‌می‌ بۆ كۆچی‌ دوايی‌ نه‌وشیروان مسته‌فا بڵاوكرده‌وه‌و رایده‌گه‌یه‌نێت، "کۆچی دوایی کاک نەوشیروان، خەسارەتێکی گەورەیە لەبزاوتی ئازادیخوای گەلەکەمان".

له‌ په‌یامه‌كه‌یدا تۆفیق شێخ تەیبی قەیوان، ئه‌وه‌ی‌ خستووه‌ته‌ڕوو،"ڕاستە ئەو ڕێبەر و براگەورەیەمان کۆچی دوایی کرد، بەڵام لەڕاستیدا، ڕێباز و بەهاو و بیروباوەڕەکانی، ئیرادە و خواستە گەورەکانی، هەردەم لەیاد و یادەوەريماندا، بەزیندویی دەمێننەوە".

ده‌قی‌ په‌یامی‌ تۆفیق شێخ تەیبی قەیوان

خوشک و برایانی خۆشەویستم کاکە نماو کاکە چیا و خاتوو چرا

بەداخ و پەژارەیەکی زۆرەوە هەواڵی کۆچی دوایی کاک نەوشیروان برا و ڕێبەر و سەرکردەی هەڵکەوتوی گەلەکەمانمان بیست، کۆچی دوایی کاک نەوشیروان، خەسارەتێکی گەورەیە لەبزاوتی ئازادیخوازی گەلەکەمان. 

هەروەکچۆن زیانێکی گەورەشە لەڕەوتی دادپەروەری و چاکسازیخوازی میللەتەکەمان و هەرگیز پڕ کردنەوەی ئەو کەلێنە گەورەیە ئاسان نابێت.

لەم کۆستە نیشتیمانیە گەورەیەدا، لەیەزدان تکا کارین، ئەو ڕێبەرە گەورەی گەلەکەمان، بەبەهەشتی میهرەبانی خۆی شاد بکات و هاوکاری کەسوکار و تەواوی میلەتەکەشمان بێت لەدەستەبەرکردنی ئارامی و سەبوریدا و هیواخوازین مەرگی ئەوجوامێرە ببێتە هەوێنی برایەتی و تەبایی و ئاشتەوایی سەرتاسەری و  هاندەرێک بێت بۆئەوەی هەموان تیایدا ڕێگای هاوکاری و هاوخەباتی و هاپەیمانێتی ڕاستەقینە بدۆزنەوە، هەتا لەو سۆنگەیەوە گەلەکەمان بەکەناری ئارامی و مەنزڵی مافی چارەنوس و سەربەخۆیی خۆی بگات .

ڕاستە ئەو ڕێبەر و براگەورەیەمان کۆچی دوایی کرد، بەڵام لەڕاستیدا، ڕێباز و بەهاو بیروباوەڕەکانی، ئیرادە و خواستە گەورەکانی، هەردەم لەیاد و یادەوەريماندا، بەزیندویی دەمێننەوە.

ئازیزەکانم، خۆتان خۆش، گیانی کاک نەوشیروان، گەورە ڕێبەی کۆچکردووی گەلەکەمان بۆ هەردەم ئاسودە.

برای دڵسۆزتان
تۆفیق شێخ تەیبی قەیوان
سلێمانی
19/5/2017



Copyright © 2016 Xendan.org all rights reserved

designed and developed by AVESTA GROUP