xendan ads

ترەمپ: هێرشەکەی پاریس کاریگەریی دەکاتە سەر هەڵبژاردنە سەرۆکایەتییەکەى ئەو وڵاتە

- 4/21/2017 3:06:00 PM 2678 جار خوێندراوەتەوە
دۆناڵد ترەمپ سەرۆکی ویلایەتە یەکگرتووەکانی ئەمەریکا

 خەندان-

سەرۆکی ویلایەتە یەکگرتووەکانی ئەمەریکا رایدەگەیەنێت هێرشەکەی پاریس ، کاریگەریی دەکاتە سەر هەڵبژاردنە سەرۆکایەتییەکەی ئەو وڵاتە کە بڕیارە رۆژی یەکشەممە بەڕێوەبچێت.

دۆناڵد ترەمپ سەرۆکی ویلایەتە یەکگرتووەکانی ئەمەریکا لە هەژماری خۆی لە تویتەر لەبارەی هێرشەکەی پاریسەوە نووسیوویەتی "هێرشێکی تری تیرۆرستی لە پاریس، گەلی فەڕەنسا چیتر ئەمە قبوڵ ناکات، ئەمە کاریگەریی گەورەی دەبێت لەسەر هەڵبژاردنە سەرۆکایەتییەکە."



شەوی رابردوو بەهۆی رووداوێكی تەقەكردن لە شەقامی شانزەلیزێی شاری پاریسی فەڕەنسا پۆلیسێك كوژراو دووانی دیكەش برینداربوون، هێرشبەرەكەش لە شوێنی رووداوەكە كوژرا.

ساتەوەختی هێرشەكەی شەقامی شانزەلیزێ‌

 

ئەمڕۆش گومانلێکراوی دووەمی هێرشەکەی شەوی رابردووی پاریس کە دەسەڵاتدارانی بەلجیکا ناسنامەکەیان دیاریی کرد، و هاوتا فەڕەنسییەکانیان لێ ئاگادار کردووە، خۆی رادەستی پۆلیسی بەلجیکی کرد.

هێرشەكەی شەوی رابردووی پاریس لەكاتێكدا دێت وابڕیارە رۆژی یەكشەممەی داهاتوو، خولی یەكەمی هەڵبژاردنی سەرۆكایەتی ئەو وڵاتە بەڕێوەبچێت.

دوای هێرشەكە، رێكخراوی داعش لە رێی ئاژانسی هەواڵی ئەعماقی تایبەت بەخۆیەوە، بەرپرسیارێتی لەو هێرشە راگەیاند و ئاشكرای كرد كە هێرشبەرەكە ناوی ئەبو یوسف بەلجیكی-بووە.

لەساڵی 2015 وە فەرەنسا "باری لەناكاوی" راگەیاندووە و لەماوەی ئەو دووساڵەشدا لەئاكامی زنجیرەیەك هێرش كە زۆرینەیان لەلایەن كەسانێك كە لەبەلجیكاو فەرەنسا گەورەبوون، ئەنجامدراون و بەهۆیانەوە زیاتر لە 230 كەس كوژراون.



Copyright © 2016 Xendan.org all rights reserved

designed and developed by AVESTA GROUP