xendan ads

سوریا؛ پرۆسەی چۆڵکردن لە چوار ناوچەی گەمارۆدراو دەستیپێکردەوە

- 4/21/2017 2:06:00 PM 3221 جار خوێندراوەتەوە
کاروانی ئەو پاسانەی دانیشوانی ناوچەکانی فوعە و کیفرایا-یان هەڵگرتووە

خەندان-

پرۆسەی چۆڵکردنی هاوڵاتیانی مەدەنی و چەکداران لە چوار ناوچەی گەمارۆدراوی سوریا ئەمڕۆ هەینی دەستیپێکردەوە دوای ئەوەی بۆ ماوەی 48 کاتژمێر راگیرابوو.

کەناڵی هەواڵی سوریا ئەمڕۆ بڵاویکردەوە پێنج پاس کە چەکدارانی ئۆپۆزسیۆن و کەسە نزیکەکانیانی هەڵگرتبوو لە ناوچەکانی نزیک دیمەشقی پایتەختەوە بەڕێکەوتن بۆ ناوچەکانی ژێر دەسەڵاتی ئۆپۆزسیۆن.

ئەو کەناڵە ئاماژەی بەوەش کردوە 10 پاسی دیکە کە سەرنشینەکانی هاوڵاتیانی شیعەمەزهەبی ناوچەکانی فوعە و کفریابوون و لەلایەن هێزەکانی ئۆپۆزسیۆنەوە گەمارۆدرابوون، گەیشتوونەتە ناوچەکانی ژێر دەسەڵاتی حکومەتی سوریا.

ئەندامانی رێکخراوی مانگی سوری عەرەبی لە نزیک کاروانی پاسەکاندا چاودێریی پرۆسەی چۆڵکردنەکە دەکەن

 

هەفتەی رابردوو حکومەتی سوریاو ئۆپۆزسیۆنی ئەو وڵاتە پرۆسەیەکیان دەستپێکرد بۆ گواستنەوەی هاوڵاتیانی چەند شارۆچکەیه‌کی گەمارۆدراو.


هاوڵاتیان بەخێرهاتنی دانیشوانی ناوچەکانی فوعە و کیفرایا دەکەن لەگەڵ گەیشتنیان بۆ ناوچەکانی ژێر دەسەڵاتی رژێمی سوریا

 
هاوڵاتیانی شارۆچکەکانی فۆعە و کێفرایا کە لە ژێر کۆنترۆڵی حکومەتی سوریادان لە باکوری رۆژئاوا دەچنە ناوچەی رەشیدین لە رۆژئاوای حەلەب.

هەروەها پرۆسەی هاوشێوە لە شارۆچکەکانی مادیا و زابادانی ژێر کۆنترۆڵی ئۆپۆزسیۆنی سوریا بەڕێوەدەچێت کە لە لایەن هێزە حکومییەکانەوە گەمارۆدراون.


پێشوازیکردنی هاوڵاتیانی شاری حەلەب لە دانیشتوانی ناوچەکانی فوعە و کیفرایا

 
چاوەڕوان دەکرێت زیاتر لە 30 هەزار هاوڵاتی به‌پێی ئەو رێکكەوتنەی حکومەت و ئۆپۆزسیۆنی ئەو وڵاتە ناوچەکانیان چۆڵ بکەن.

روانگەی سوریی بۆ مافەکانی مرۆڤ رایگەیاند هەڵپەساردنی پرۆسەی چۆڵکردنەکە بۆ ماوەی 48 کاتژمێر بەهۆی داوایەکی ئۆپۆزسیۆنەوە بووە لە حکومەت بۆ ئازادکردنی 750 زیندانی بەپێی رێککەوتنەکە. سەرەڕای ئەوەی بەرەبەیانی ئەمڕۆ پرۆسەکە دەستیپێکردەوە، بەڵام هێشتا روون نییە ئایا زینداییەکان ئازادکراون یاخود نا.

مانگی رابردوو نەتەوە یەکگرتووەکان دۆخی ئەو چوار شارۆچکەیەی بە "کارەسات" ناوبرد کە زیاتر لە 64 هەزار هاوڵاتی مەدەنی تێیاندا گەمارۆدراون و باس لەوە دەکرێت چەندین هاوڵاتی بەهۆی کەمی خواردن و پێداویستی تەندروستییەوە گیانیان لەدەست داوە.
 


نیشانەکردن :

#سوریا

Copyright © 2016 Xendan.org all rights reserved

designed and developed by AVESTA GROUP