xendan ads

نرخی نەوت بەرزبووەوە

- 4/21/2017 1:41:00 PM 5652 جار خوێندراوەتەوە

خەندان-

نرخەکانی نەوتی خاو بەرزبوونەوەیان بەخۆیانەوە بینی، بەڵام هێشتا بەرەو ئەوە دەچن گەورەترین دابەزینی هەفتانە لەماوەی مانگێکدا تۆماربکەن بەهۆی گومان لە رێکەوتنەکەی ئۆپیک بۆ گەڕاندنەوەی هاوسەنگی بۆ بازاڕ.

بەپێی ئاژانسی رۆیتەرز، ئەمڕۆ هەینی لە کاتژمێر 9:42 خولەک بەکاتی هەولێر، نرخی نەوتی خاوی برینت 8 سەنت بەرزبووەتەوە و هەر بەرمیلێکی لە بازاڕەکانی جیهاندا بە 53.07 دۆلار فرۆشراوە، بەڵام بەرەو ئەوەدەچێت گەورەترین دابەزینی هەفتانە بەڕێژەی لەسەدا 5 تۆمار بکات لە رۆژی 10ی ئازارەوە.

بەهەمان شێوە نرخی نەوتی خاوی رۆژئاوای تەکساسی ئەمەریکاش کەمێک بەرزبووەتەوەو بەبەراورد بە نرخەکەی پێشووی 11 سەنت بەرزبووەتەوە و نرخی هەر بەرمیلێکی بە 50.82 دۆلار لە بازاڕەکانی جیهاندا مامەڵەی پێوەکراوە.
 
نەوتی خاوی ئەمەریکیش بەڕێژەی لەسەدا 4.5 دابەزینی هەفتانەی بەخۆیەوە بینیووە کە گەورەترین رێژەیە لە رۆژی 10ی ئازارەوە.
نرخەکانی هەردوو جۆرە نەوتە جیهانییەکە بە رێژەی زیاتر لەسەدا 3.5 لەسەرەتای ئەم هەفتەیەدا دابەزین دوای ئەوەی گومانەکان دەرکەوتن لە کاریگەریی هەوڵەکانی وڵاتانی ناو رێکخراوی ئۆپیک بۆ کەمکردنەوەی ئاستی بەرهەمهێنان بەبڕی 1.8 ملیۆئنی رۆژانە لە نیوەی یەکەمی ئەمساڵدا.

بەگوێرەی ئامارەکانی رۆیتەرز، لەمانگی نیساندا 48 ملیۆن بەرمیل نەوت لەڕێی ئۆقیانووسەکانەوە تێپەڕبووە، ئەوەش لەسەدا 5.8 زیاترە بەبەراورد بە مانگی کانونی یەکەمی ساڵی رابردوو.

كۆتایی‌ مانگی كانونی یەكەمی ساڵی‌ رابردوو، ئەندامانی رێكخراوی ئۆپیك، گەیشتنە رێكکەوتن لەسەر كەمكردنەوەی ئاستی بەرهەمهێنانی نەوت، ئەوەش یەكەمین رێكکەوتنی لەو شێوەیەی ئەو وڵاتانەیە لەدوای ساڵی 2008ەوە.

دواتر بەرهەمهێنەرانی نەوت لە رێكخراوی ئۆپیك ‌و وڵاتانی دەرەوەی رێكخراوەكە كە 11 وڵاتن، بۆ یەكەمجار لە ساڵی 2001ەوە رێكەوتن بەهاوبەشی بەرهەمهێنانی نەوت سنوردار بكەن ئەوەش بۆ كەمكردنەوە و نەهێشتنی كەڵەكەبوونی نەوتی خاو. 

بۆ راوەستاندنی دابەزینی نرخەكانی نەوتی خاو، ئەندامانی رێكخراوی ئۆپیك لەگەڵ ئەوەدان رێكکەوتنەكە درێژێژبكرێتەوە، كە ئامانج لێی هاوسەنگ كردنی بازاڕی نەوتە و لەمانگی حوزەیرانی ئەمساڵدا وادەكەی بەسەردەچێت. 

بەپێی رێكکەوتنەكە 14 وڵاتەكەی ئەندامی رێكخراوی ئۆپیك 1.2 ملیۆن بەرمیل نەوتی رۆژانە كەم دەكەنەوەو بەوەش كۆی ئاستی بەرهەمهێنانی رۆژانەی نەوتی ئەو وڵاتانە كەمدەبێتەوە بۆ 32.5 ملیۆن بەرمیل.

رێكکەوتنەكانی وڵاتانی ئۆپیك و دەرەوەی ئۆپیك، رۆژانە ملیۆنێك و 800 هەزار بەرمیل هەناردەی رۆژانە كەمدەكاتەوە، بە جۆرێك  دەرەوەی ئۆپیك 600 هەزار بەرمیل رۆژانە هەناردە كەمدەكەنەوەو وڵاتانی ئۆپیكیش ملیۆنێك و 200 هەزار كەمدەكەنەوە. 


نیشانەکردن :

#نەوت

Copyright © 2016 Xendan.org all rights reserved

designed and developed by AVESTA GROUP