بەپەلە

ئەردۆغان: ناتوانم بەڵێ و نەخێری‌ ریفراندۆم لەیەك تای تەرازوودا دابنێم

- 4/16/2017 8:11:00 AM 6991 جار خوێندراوەتەوە
رەجەب تەیب ئەردۆغان

خەندان-

رەجەب تەیب ئەردۆغان سەرۆك كۆماری توركیا رایگەیاند، ناتوانێت بەڵێ و نەخێرى ریفراندۆم لە یەك تای تەرازوودا دابنێت، ئەگەر هەموویان بخەیە نێو یەك تای تەرازووەوە، ئەی ئەو هەموو خەباتە لەپێناو چیدا دەكەن.

ئەو وتانەی رەجەب تەیب ئەردۆغان سەرۆكی كۆماری توركیا لەمیانی پێشكەشكردنی وتارێكدا هات لە ناوچەی توزڵای ئیستانبوڵی توركیا.

بەیانی ئەمڕۆ پڕۆسەی دەنگدا لەسەر گۆڕانكاری دەستوری لەتوركیا دەستیپێكردو ركابەری سەخت لە نێوان چوار حیزبی سەرەكی ئەو وڵاتەدا بەڕێوەدەچێت، هەریەكە لە پارتی جەهەپە و هەدەپە بە بەرەی "نەخیر" و پارتی ئاكەپەو مەهەپە بەبەرەی "بەڵێ" ناسراون.

ئەردۆغان ئاماژەی بەوەشكرد، "ئەو كەسەی دەنگ بە نەخێر دەدات، لێی تێدەگەم، بەڵام ناتوانم بەیەك شێوە تەماشای ئەوەی كە دەڵێت بەڵێ و ئەوەی كە دەڵێت نەخێر، بكەم،  چۆن دەكرێت بیانخەمە نێو یەك تای تەرازوو، ئەوەی كە بە تێگەیشتنەوە پێشوازییان لێدەكەین، جودایە، چونكە ئەمە دیموكراسییە''.

ئەردۆغان وتیشی "هەموویان بخەینە نێو یەك تای تەرازووەوە، ئەی ئەو هەموو خەباتە لەپێناو چیدا دەكەین، وانییە؟''.

هاوڵاتیانی توركیا تا ئێستا شەش جار بەمەبەستی دەنگدان لەسەر گۆڕانكاریی دەستوور روویان لە سندووقەكانی دەنگدانكردووە، ئەوەش لە هەریەك لە ساڵەكانی ١٩٦١و ١٩٨٢، ١٩٨٧و ٢٠٠٧ و ٢٠١٠٠دا،  ئەنجامی سەرجەم گشتپرسییەكان 'بەڵێ' بووە جگە لە گشتپرسییەكەی ساڵی ١٩٨٨ كە بە ئەنجامی ''نەخێر'' كۆتایی هاتووە.

لەگشتپرسییەكەی ئەمڕۆدا 55 ملیۆن و 319 هەزار و 222 دەنگدەر لەناوخۆی توركیادا، لە 167 هەزار و 140 سندوقدا دەنگدەدەن، كە یەك ملیۆن و 269 هەزار و 282 لەو دەنگدەرانە دەنگدەری نوێن و تا رۆژی دەنگدانەكە تەمەنیان دەبێت بە 18 ساڵ، هەروەها لە بەندیخانەكانیش 461 سندوق دادەنرێت.

پڕۆسەی دەنگدانەكە، لە شارەكانی باشوور و رۆژهەڵاتی توركیا كاتژمێر 7:00ی بەیانی دەستیپێكرد، تاوەكو كاتژمێر 4:00 ئێوارە دەنگدان بەڕێوەدەچێت، لە شارەكانی دیكەش كاتژمێر 8:00 ی بەیانی بۆ كاتژمێر 5:00ی ئێوارە دەنگدان بەڕێوەدەچێت.


Copyright © 2016 Xendan.org all rights reserved

designed and developed by AVESTA GROUP