xendan ads

"وام دەزانی ئاسمان دەڕوخێت"
چیرۆكی بەكارهێنانی گەورەترین بۆمب لەلایەن ئەمەریكاوە

- 4/14/2017 7:19:00 PM 70130 جار خوێندراوەتەوە
ساتی بەكارهێنانی بۆمبەكە

خەندان- رێنوار نەجم 

دوای ئەنجامدانی نوێژی ئێوارە، محەممەد شەهزادە دەرگاكانی ماڵەوەی داخست و بۆ خواردنی نانی ئێوارە دانیشت، لەو كاتەدا تەقینەوە گەورەكە روویدا، ئاسمان بە گڕ داپۆشراو لە زەویشەوە لەرینەوەكیان پێگەیشت.

ویلایەتە یەكگرتووەكانی ئەمەریكا پێنجشەممەی رابردوو، بە بۆمبێكی پێشكەوتوو پێگەكانی داعشی‌ لە ئەفغانستان بۆردومانكرد كە بە "دایكی بۆمبەكان" ناسراوەو گەورەترین بۆمبی نا-ئەتۆمییە لەجیهاندا.

"زەوییەكە لەوە دەچوو بەلەمێك بێت لە ناو زریانێكدا" شەهزادە كە هاوڵاتییەكی ئەفغانی نزیك شوێنی بۆردومانەكەیە وای بە ماڵپەڕی گاردیانی بەریتانی وتووە.

هەروەها وتوویەتی، "وامدەزانی ماڵەكەم بۆردومان كرا، ساڵی رابردوو موشەكێكی فڕۆكە بێفڕكەوانەكان خانوویەكی تەنیشت ئەوەی منی كردە ئامانج، بەڵام ئەمجارە وام هەستدەكرد ئاسمان دەڕوخێت، منداڵەكان و ژنەكان زۆر ترسان."

ئەو بۆمبە كە كێشەكەی 11 هەزار كیلۆیە و هەشت هە زار و 482  كیلۆ ماددەی تەقەمەنی هەڵگرتووە، لە چیایەكی نزیك گوندی مۆمان لە ناوچەی ئەسادخل بەكارهێنراوە، ئەوێش 1.5 میل لە شوێنی ژیانی  محەممەد شەهزادە دوورە.

"گوێچكەكانم بۆ ماوەیەك كەڕ بوون، پەنجەرەو دەرگاكان شكان، دیوارەكان درزیان برد" ئەو هاوڵاتییە ئەفغانییە وادەڵێت.

وتەبێژی وەزارەتی بەرگری ئەفغانستان ئەمڕۆ ئاشكرایكرد، بەهۆی ئەو هێرشەكەەوە 36 چەكداری داعش كوژراون و بۆمبەكە سێ تونێلی ژێر زەوی خاپوركردووە هەروەها چەك و زەخیرەی ئەو رێكخراوەشی لەناو بردووە، "بەڵام هیچ هاوڵاتییەكی مەدەنی زیانی پێنەگەیشتووە."

راشیگەیاندووە، بۆمبەكە سێ تونێلی ژێر زەوی خاپوركردووە هەروەها چەك و زەخیرەی ئەو رێكخراوەشی لەناو بردووە، "بەڵام هیچ هاوڵاتییەكی مەدەنی زیانی پێنەگەیشتووە."
بەرەبەیانی ئەمڕۆ هەینیش جارێكی دیكە فڕۆكە جەنگییەكان ناوچەكەیان بۆردومان كردووەتەوە، ئەوەش بە وتەی فەرماندەیەكی پۆلیسی ئەو ناوچەیە بەناوی باز جان.

"نازانین دوێنێ و ئەم بەیانیەش كێ كوژران، بەڵام ترس و دڵەڕاوكی لەو گفتگۆ رادیۆییانەدا هەیە كە ئێمە رایاندەگرین، گفتوگۆیەكی سنوردار هەیە لەنیوان چەكدارانی داعشدا" فەرماندەكەی پۆلیس وادەڵێت.

بەرپرسێكی ئاسایشی ناوخۆش رایگەیاندووە ئەوان داوای بۆردومانی قورسیانكردووە بەهۆی ئەوەی بۆردومانی فڕۆكەو فڕۆكە بێفڕۆكەوانەكان نەیانتوانیوە ئەو تونێلانەی داعش لەناو ببەن.

بەڵام بەشێك لە چاودێرانی پێویستی بەكارهێنانی ئەو جۆرە چەكە بەو قەبارەیە دەخەنە ژێر پرسیارەوە دژی گروپێك كە مەزەندە دەكرێت 600 بۆ 800 چەكداربن و هەڕەشەیەكی سنوردارن لەسەر دەوڵەتی ئەفغانستان.

"گومان لە دڕندەیی داعش نییە و ئەوان زۆر كاری دڕندانەیان لە دژی خەڵكی ئێمە ئەنجام داوە، بەڵام نازانم بۆ ئەو بۆمبە بەكارهات، ئەوە خەڵكەكەی ئێمەی ترساند. خزمەكانم وایاندەزانی كۆتایی دنیا هاتووە، هەموو رۆژێك فڕۆكەی جەنگی، هێلیكۆپتەرو فڕۆكەی بێ فڕۆكەوان لەو ناوچەیەدان،" قایمقامی ناوچەین ئاچین، نەوید شینواری وا دەڵێت. 
   
 ئەوە یەكەمین جارە ئەو جۆرە بۆمبە لە شەڕدا بەكاربهێندرێت و لە فڕۆكەیەكی جەنگی جۆری MC-130 ەوە بۆردومانەكە كراوە.



Copyright © 2016 Xendan.org all rights reserved

designed and developed by AVESTA GROUP